ក្រុមហ៊ុន OPPO បានដាក់បង្ហាញនូវ Teaser របស់ OPPO Find N5 ដែលជាស្មាតហ្វូនបត់បន្ទាប់របស់ខ្លួនហើយ មុនការដាក់លក់នៅប្រទេសចិនក្នុងខែកុម្ភៈខាងមុខនេះ។ ក្នុងនោះ ប្រធាន OPPO Find Series លោក Zhou Yibao បាននិយាយថា OPPO Find N5 នឹងក្លាយជាស្មាតហ្វូនដែលអាចបត់បានស្តើងបំផុតក្នុងពិភពលោក។
ជាមួយគ្នានេះ បើតាមរូបភាពនៃការប្រៀបធៀបគ្នាជាមួយ iPhone 16 Pro Max របស់ Apple, ស្មាតហ្វូនបត់របស់ OPPO គឺ OPPO Find N5 នឹងមានកម្រាស់ស្មើកាតធនាគារចំនួន៤ ឬក៏កាក់ ១ យន់ចំនួន ២ ដាក់ត្រួតលើគ្នាតែប៉ុណ្ណោះ តែបើមើលនឹងភ្នែកផ្ទាល់ពិតជាស្តើងមែនទែន ប៉ុន្តែភាពធន់របស់ស្មាតហ្វូនមួយនេះមិនទាន់ត្រូវបានបង្ហាញនូវឡើយទេ តែអាចនឹងធន់ខ្លាំងដោយសារមានអាវការពារ IPX6, IPX8 និង IPX9 ។
គួរឲដឹងថា OPPO Find N5 អាចនឹងក្លាយជាស្មាតហ្វូនបត់ដែលមានកម្រាស់ស្តើងជាងនៅក្នុងឆ្នាំ២០២៥ នេះ បន្ទាប់ពី HONOR Magic V3 ដែលជាស្មាតហ្វូនដែលអាចបត់បានស្តើងបំផុតក្នុងឆ្នាំ២០២៤ ដោយមានកម្រាស់ត្រឹមតែ ៤,៣៥មីលីម៉ែត្រ ប៉ុណ្ណោះ ពោលគឺ OPPO Find N5 នឹងកម្រាស់ស្តើងជាងនេះទៅទៀត។
ម៉្យាងវិញទៀត OPPO Find N5 នឹងមានការរចនាជាមួយតួខ្លួនទីតានីញ៉ូម ដំណើរការដោយឈីបរបស់ Qualcomm គឺ Snapdragon 8 Elite ជាមួយ ColorOS 15 និង Android 15 ព្រមទាំងអាចនឹងទទួលបាននូវលេន periscope telephoto ទំហំ 50MP រន្ធសាកប្រភេទ USB Type-C និងមានថ្មប្រហែល 5,700mAh គាំទ្រការសាកថ្មឥតខ្សែកម្លាំង 50វ៉ាត់ និង ៨០វ៉ាត់ តាមខ្សែ៕