ក្រុមហ៊ុន Samsung នឹងដាក់បង្ហាញស៊េរី Galaxy S25 របស់ខ្លួននៅសប្តាហ៍ក្រោយនៅថ្ងៃទី ២២ ខែមករា ហើយបើយោងតាមការផ្សាយរបស់ Technoblog បានចែករំលែកព័ត៌មានសំខាន់ៗដែលមើលទៅមានលក្ខណៈផ្លូវការមួយចំនួន ដែលរៀបរាប់លម្អិតអំពីលក្ខណៈពិសេសសំខាន់ៗ និងមុខងារ AI ថ្មីៗដែលនឹងមកដល់នៅក្នុងទូរស័ព្ទថ្មីទាំងនេះ។
សម្រាប់ Galaxy S25+ រួមទាំង S25 នឹងមានកាមេរ៉ាមេទំហំ 50MP គាំទ្រការថត 2x in-sensor zoom បូកនឹងលេន 3x telephoto 10MP និង 12MP ultrawide ។ ទាំង២ ម៉ូឌែលនេះនឹងបំពាក់កាមេរ៉ា Selfie ទំហំ 12MP ផងដែរ។ រីឯ Galaxy S25+ នឹងទទួលបានថាមពលថ្ម 4,900 mAh ដូចគ្នាទៅនឹងស្មាតហ្វូនជំនាន់មុនដែល អាចប្រើប្រាស់បានរហូតដល់ ៣០ ម៉ោងសម្រាប់ការចាក់វីដេអូ។
ចំណែក Galaxy S25 Ultra វិញ នឹងទទួលកាមេរ៉ាដូចគ្នាទៅនឹងជំនាន់មុនដែរមានកាមេរ៉ាមេ 200MP គាំទ្រការថត 2x in-sensor zoom, បូកនឹងលេន 50MP periscope គាំទ្រការថត 5x optical zoom, លេន 10MP telephoto គាំទ្រការថត 3x optical zoom និងការអាប់ដេតតែមួយគត់គឺលេន 50MP ultrawide ថ្មី ដែលជំនួសសេនស័រ 12MP នៅក្នុងជំនាន់មុន។ ខណៈផ្នែកខាងមុខនឹងមានកាមេរ៉ា Selfie ទំហំ 12MP ដែលមិនមានអ្វីថ្មីនោះទេ។
ជាមួយគ្នានេះ ថ្មនៅលើ S25 Ultra នឹងមានថាមពល 5,000 mAh ដូចគ្នាដែរ ហើយ Samsung បានអះអាងថាអាចមើលវីដេអូបានរហូតដល់ ៣១ ម៉ោង។
គួរឲដឹងថា ទូរស័ព្ទស៊េរី Galaxy S25 ទាំងអស់នឹងត្រូវបានបំពាក់ដោយបន្ទះឈីប Snapdragon 8 Elite ភ្ជាប់ជាមួយ RAM ទំហំ 12GB ជាស្តង់ដារ៕