យោងតាមព័ត៌មានដែលបានចែកចាយកាលពីពេលថ្មីៗនេះ បាននិយាយថា ទូរស័ព្ទដៃ Google Pixel 9a នឹងទទួលបាននូវមុខងារ និងការអាប់ឌែតថ្មីៗដែលគួរឲ្យចាប់អារម្មណ៍ជាច្រើន ហើយគ្រោងនឹងដាក់បង្ហាញចេញជាផ្លូវការនៅក្នុងឆ្នាំ២០២៥ ខាងមុខនេះ។
ចំពោះទូរស័ព្ទដៃ Google Pixel 9a ត្រូវបានគេរំពឹងថានឹងមានកាមេរ៉ាសំខាន់ថ្មីៗដែលបំពាក់ជាមួយកាមេរ៉ាគោលខាងក្រោយទំហំ 48MP ជាប្រភេទសេនស័រ Sony IMX787 ដែលដូចគ្នានឹងសេនស័រដែលប្រើនៅក្នុង Pixel 9 Pro Fold រួមជាមួយនឹងមុខងារគាំទ្រ OIS ដើម្បីគ្រប់គ្រងលំនឹងដែលធានាបាននូវគុណភាព ដោយជំនួសនឹងសេនស័រទំហំ 64MP នៅក្នុង Pixel 8a។ ថែមលើពីនេះទៅទៀត ទូរស័ព្ទដៃ Google Pixel 9a អាចនឹងទទួលបានលេន Ultra-wide ទំហំ 13MP ជាប្រភេទសេនស័រ Sony IMX712 និងកាមេរ៉ាមុខទំហំ 13MP ដែលមានសេនស័រដូចគ្នាទៅនឹងលេន Ultra-wide ។
លើសពីនេះទៅទៀត ទូរស័ព្ទដៃ Google Pixel 9a ត្រូវបានគេរំពឹងថានឹងមានមុខងារថ្មី “Add Me” ដែលអនុញ្ញាតឱ្យអ្នកថតរូបជាក្រុមអាចទទួលបាននូវមុខងារមួយកាន់តែមានភាពងាយស្រួល និងធានាបានថាមនុស្សគ្រប់គ្នានឹងមាននៅក្នុងរូបថតដែលអ្នកបានថត។
សម្រាប់ការរចនារបស់ Pixel 9a អាចនឹងមានប្រវែងតួខ្លួនសរុប ១៥៤,៧ ម.ម ទទឹង ៧៣,២ ម.ម និងកម្រាស់ ៨,៩ ម.ម ដែលធំជាង Pixel 8a បន្តិច។ ក្នុងនោះ ទូរស័ព្ទដៃ Google Pixel 9a ត្រូវបានគេរំពឹងថានឹងប្រើប្រាស់នូវបន្ទះឈីប Tensor G4 SoC ហើយវាក៏នឹងប្រើប្រាស់នូវ Modem Exynos 5300 សម្រាប់គាំទ្របណ្តាញ 5G ផងដែរ៕