កាលពីពេលថ្មីៗនេះ ក្រុមហ៊ុនផលិតទូរស័ព្ទដៃ Realme បានធ្វើការដាក់បង្ហាញនូវបច្ចេកវិទ្យាថ្មីមួយរបស់ខ្លួនដែលពួកគេឲឈ្មោះថា SuperSonic Charge ជាមួយសមត្ថភាពសាកថ្មល្បឿនលឿន ៣២០វ៉ាត់ ដែលធ្វើឡើងនៅក្នុងព្រឹត្តិការណ៍ 828 Fan Festival ក្នុងទីក្រុង Shenzhen ប្រទេសចិន ដូចដែលវាបានសន្យាកាលពីយប់ម្សិលមិញនេះ។
ក្រុមហ៊ុនបាន Realme បាននិយាយថា 320W SuperSonic Charge គឺអនុញ្ញាតឱ្យតែស្មាតហ្វូនដែលមានថាមពលថ្ម 4420mAh ប៉ុណ្ណោះ ទើបអាចសាកបាន ដោយសាកមួយពេញក្នុងរយៈពេលត្រឹមតែ ៤ នាទី និង ៣០ វិនាទីប៉ុណ្ណោះ។ ពួកគេបាននិយាយបន្ថែមទៀតថា ឆ្នាំងសាក ៣២០វ៉ាត់ អាចសាកបានថាមពល ២៦ភាគរយ ចំណាយពេលត្រឹមតែ ១នាទីប៉ុណ្ណោះ ហើយជិត ២នាទី អាចឡើងដល់ ៥០ភាគរយ។ សម្រាប់ការសាកជាមួយរន្ធ USB-C ចំនួន ២ វិញ វាផ្តល់នូវកម្លាំង ១៥០វ៉ាត់ សម្រាប់ទូរសព្ទ និង ៦៥វ៉ាត់ សម្រាប់កុំព្យូទ័រ។ លើសពីនេះទៅទៀត ឆ្នាំងសាកនេះក៏គាំទ្រការសាកតាម UFCS, PD និង SuperVOOC ផងដែរ។
ចំពោះ ឆ្នាំងសាក ៣២០វ៉ាត់ នេះ ត្រូវបានសិក្សាស្រាវជ្រាវ និងអភិវឌ្ឍន៏អស់រយៈពេលប្រមាណ ២ឆ្នាំ ទើបចេញជាផ្លែផ្កា។ វាត្រូវបានបំផុសគំនិតបង្កើតឡើងពីថ្ម Cell ចំនួន ៤ រួមបញ្ចូលទាំងកោសិកាដែលកោសិកានីមួយៗមានកម្រាស់ក្រោម ៣មីលីម៉ែត្រ ដើម្បីធ្វើឲវាមានសមត្ថភាពសាកបានលឿន និងមានសុវត្ថិភាពនៅពេលប្រើប្រាស់។
គួរឲដឹងថា ឆ្នាំសាកនេះត្រូវបានកាត់បន្ថយចំនួនវ៉ុលមកត្រឹម ២០វ៉ុល ប៉ុណ្ណោះ ដើម្បីការពារថ្មមិនឲឡើងកម្ដៅ ហើយវាមានដង់ស៊ីតេថាមពលដ៏ខ្ពស់ពោលគឺ ៣,៣វ៉ាត់ ក្នុងមួយសង់ទីម៉ែត្រគូប។