ក្រុមហ៊ុន Subaru និង Toyota មានភាពជាដៃគូដ៏ជោគជ័យមួយ អស់រយៈពេលជាច្រើនឆ្នាំមកហើយ។ មិនតែប៉ុណ្ណោះ គេបានចាត់ទុកថា ការផលិតរថយន្ត Toyota 86 និង Subaru BRZ ជាសមិទ្ធិផលដែលទទួលបានជោគជ័យបំផុតរបស់ពួកគេ ប៉ុន្តែស្របពេលដែលឧស្សាហកម្មនេះបានចាប់យករថយន្តអគ្គិសនីយ៉ាងឆាប់រហ័ស ពួកគេក៏បានផ្លាស់ប្តូរអាទិភាពរបស់ខ្លួន។
ងាកត្រលប់ទៅមើលកាលពីឆ្នាំ ២០១៩ ក្រុមហ៊ុនជប៉ុនទាំងពីរបានប្រកាសថា ពួកគេនឹងសហការណ៍បង្កើតគ្រោងឆ្អឹងថ្មីមួយសម្រាប់ប្រើលើរថយន្តអគ្គិសនី។
ដើម្បីអភិវឌ្ឍបច្ចេកវិជ្ជាថ្មីៗបន្ថែមទៀត Subaru បានប្រកាសទិញភាគហ៊ុនរបស់ក្រុមហ៊ុន Toyota Motor Corporation រហូតដល់តម្លៃប្រមាណ ៧០ ពាន់លានយ៉េន ឬប្រហែល ៦៧៥ លានដុល្លារ។ កាលពីចុងឆ្នាំ២០២០ ក្រុមហ៊ុន Toyota បានបង្ហាញរថយន្តប្រភេទ SUV អគ្គិសនីធុនមធ្យម ដែលមានបំពាក់គ្រោងឆ្អឹង e-TNGA ផលិតដោយក្រុមហ៊ុនទាំងពីរ។
មិនយូរប៉ុន្មានបន្ទាប់ពីនោះ Subaru បានចែករំលែកព័ត៌មានអំពីរថយន្តអគ្គិសនីរបស់ខ្លួន ដែលនឹងត្រូវចេញនៅទ្វីបអឺរ៉ុប ទោះបីជាកាលបរិច្ឆេទជាក់លាក់មិនទាន់បង្ហាញក៏ដោយ។ វានឹងក្លាយជារថយន្តអគ្គិសនីដំបូងបង្អស់របស់ Subaru។
ជាមួយនឹងជំនាញផ្នែករថយន្តអគ្គិសនីរបស់ Toyota និងកេរ្តិ៍ឈ្មោះរបស់ Subaru សម្រាប់ប្រព័ន្ធប៉ុងពីរដ៏រឹងមាំរបស់វា SUV អគ្គិសនីនោះនឹងមានសមត្ថភាព និងរឹងមាំខ្លាំង។
ឥឡូវនេះ ក្រុមហ៊ុន Subaru បានធ្វើការទិញភាគហ៊ុនចុងក្រោយរបស់ពួកគេ ចំនួន ៨ ៩៧៣ ៧០០ ហ៊ុន ស្មើនឹងចំនួនភាគហ៊ុន ០,៣ ភាគរយនៅក្នុងក្រុមហ៊ុន Toyota ដើម្បីកែលម្អ និងការអភិវឌ្ឍបន្ថែមទៀតលើបច្ចេកវិទ្យាអគ្គិសនី និងស្វយ័តរវាងម៉ាកទាំងពីរ៕