យោងតាមទិន្នន័យដែលចេញផ្សាយដោយក្រុមប្រឹក្សាអភិវឌ្ឍន៍សេដ្ឋកិច្ច (EDB) កាលពីថ្ងៃពុធកន្លងទៅនេះ បានឲ្យដឹងថាប្រទេសសិង្ហបុរីបានទាក់ទាញការប្តេជ្ញាចិត្តវិនិយោគថេរ ចំនួន ១៧,២ ពាន់លានដុល្លារសិង្ហបុរី ឬប្រហែល ១៣ ពាន់លានដុល្លារអាមេរិក កាលពីឆ្នាំមុន ពោលគឺកើនឡើងពី ១៥,២ ពាន់លានដុល្លារសិង្ហបុរីកាលពីឆ្នាំកន្លងមក។
ចំនួនតួលេខនេះគឺលើសពីគោលដៅរបស់ EDB ដែលរំពឹងថាបានត្រឹមចន្លោះ ៨ ទៅ ១០ ពាន់លានដុល្លារសិង្ហបុរីក្នុងមួយឆ្នាំ។ មិនតែប៉ុណ្ណោះ តួលេខនេះក៏មានចំនួនខ្ពស់បំផុតផងដែរ ចាប់តាំងពីឆ្នាំ ២០០៨ មក។
គួរឲ្យដឹងថា ផ្នែកអេឡិចត្រូនិច និងគីមី នៅតែជាប្រភពវិនិយោគធំជាងគេ ២ កាលពីឆ្នាំមុន ដោយមានទឹកប្រាក់ ៦,៥ ពាន់លានដុល្លារសិង្ហបុរី និង ៤,១ ពាន់លានដុល្លារសិង្ហបុរី។
តាមតំបន់ សិង្ហបុរីឃើញថាការវិនិយោគភាគច្រើនបានមកពីសហរដ្ឋអាមេរិក (៥៣,៤ ភាគរយ) បន្ទាប់មកគឺទីផ្សារក្នុងស្រុក (១៧,៣ ភាគរយ) និងអឺរ៉ុប (១៧,១ ភាគរយ)៕