ក្រុមហ៊ុនអាកាសចរណ៍ United Airlines កាលពីថ្ងៃពុធកន្លងទៅនេះបានរាយការណ៍ថា ខ្លួនបានខាតបង់លុយយ៉ាងច្រើននៅឆ្នាំ ២០២០ បន្ទាប់ពីការវាយប្រហារដ៏សាហាវរបស់កូវីដ១៩ ប៉ុន្តែក្រុមហ៊ុននេះកំពុងសំឡឹងមើលឃើញការងើបឡើងវិញមួយផ្នែក នៅឆ្នាំ ២០២១។
ក្រុមហ៊ុន United Airlines បានរាយការណ៍ពីការខាតបង់ប្រចាំឆ្នាំចំនួន ៧,១ ពាន់លានដុល្លារ បើប្រៀបធៀបនឹងប្រាក់ចំណេញ ៣ ពាន់លានដុល្លារ ក្នុងឆ្នាំ ២០១៩។
ប្រាក់ចំណូលសម្រាប់ឆ្នាំមុនធ្លាក់ចុះ ៦៤,៥ ភាគរយ ដល់ ១៥,៤ ពាន់លានដុល្លារ ដែលជាទិន្នន័យចុងក្រោយ សម្រាប់ក្រុមហ៊ុនអាកាសចរណ៍អាមេរិកខាងលើ បន្ទាប់ពីការធ្វើដំណើរថយចុះខ្លាំងបំផុតកាលពីខែមីនា នៅពេលមានការផ្ទុះឡើងខ្លាំងនៃជំងឺកូវីដ១៩។
គួរឲ្យដឹងថា ក្រុមហ៊ុនអាកាសចរណ៍ធំៗរបស់អាមេរិកទាំងអស់ បានខាតបង់យ៉ាងច្រើនក្នុងឆ្នាំ ២០២០ ហើយដើម្បីកាត់បន្ថយថ្លៃដើម ក្រុមហ៊ុនអាកាសចរណ៍បានយកយន្តហោះចេញពីសេវាកម្ម ហើយបានកាត់បន្ថយចំនួនបុគ្គលិកក្នុងករណីខ្លះតាមរយៈការលើកទឹកចិត្តចូលនិវត្តន៍ដោយស្ម័គ្រចិត្តទៀតផង៕