មុខងារថ្មីចុងក្រោយដែលបានបន្ថែមនៅលើ YouTube Music គឺជាមុខងារគ្រហឹមជាសម្លេងភ្លេងដើម្បីស្វែងរកបទចម្រៀង ដែលមុខងារនេះនឹងជាប្រយោជន៍ធំសម្រាប់អ្នកប្រើប្រាស់ដែលចង់ស្វែងរកបទចម្រៀងដែលខ្លួនបានឮ។
អ្នកប្រើប្រាស់នឹងអាចស្វែងរកបទចម្រៀងតាមរយៈការគ្រឹម ការច្រៀង ឬលេងជាចង្វាក់ភ្លេងឲ្យ YouTube Music ស្ដាប់។ ដំបូងមុខងារនេះ ជាផ្នែកមួយនៃការធ្វើតេស្តរបស់ YouTube ហើយទើបពេលនេះដែលបានបញ្ចេញឲ្យប្រើប្រាស់ជាផ្លូវការសម្រាប់អ្នកប្រើលើឧបករណ៍ Android។
ដើម្បីប្រើប្រាស់មុខងារនេះ អ្នកប្រើគ្រាន់តែចុចលើប៊ូតុងកែវពង្រីក នៅផ្នែកលើខាងស្ដាំនៃកម្មវិធី YouTube Music។ នៅក្បែរប៊ូតុងមីក្រូហ្វូន អ្នកប្រើប្រាស់នឹងឃើញប៊ូតុងថ្មីជារលកសម្លេង ដែលជាមុខងារស្វែងរកថ្មីនេះឯង៕
គួរដឹងថាការបញ្ចេញមុខងារថ្មីនេះកំពុងស្ថិតក្នុងដំណើរការនៅឡើយ ហើយវាមានបង្ហាញសម្រាប់អ្នកប្រើ Android ជាមួយ YouTube Music 7.02 ឯអ្នកប្រើប្រាស់ iOS រំពឹងថានឹងអាចប្រើប្រាស់មុខងារនេះបានឆាប់ៗ៕