Google បានចាប់ផ្ដើមបញ្ចេញមុខងារ Find My Device កាលពីមួយខែមុន ដែលមានបញ្ចូលមុខងារពិសេសមួយសម្រាប់អ្នកប្រើ Pixel 8 និង Pixel 8 Pro ដោយស្មាតហ្វូនពីរនេះនៅតែអាចរាយការណ៍ពីទីតាំងរបស់ខ្លួនបាន ទោះបីជាអស់ថ្ម ឬទូរសព្ទបានបិទក៏ដោយ។
វិធីដែល Find My Device របស់ Google ដំណើរការនោះគឺឧបករណ៍ Android ដែលបានបាត់ អាចផ្ដល់សញ្ញាដល់ឧបករណ៍ Android ដែលនៅក្បែរដោយប្រើ Bluetooth អំពីទីតាំងរបស់ខ្លួនទៅដល់ម្ចាស់ឧបករណ៍។
ប៉ុន្តែស្មាតហ្វូន Android ភាគច្រើន មិនអាចផ្ដល់សញ្ញាតាម Bluetooth បានឡើយនៅពេលដែលអស់ថ្ម ឬបិទ។ នេះដោយសារឈីប Bluetooth របស់ស្មាតហ្វូនទាំងនេះ ត្រូវបិទដូចគ្នានៅពេលដែលប្រព័ន្ធប្រតិបត្តិការប្រាប់ឲ្យ CPU បិទដំណើរការគ្រប់យ៉ាង។
Google បានឲ្យដឹងថា Pixel 8 និង Pixel 8 Pro បានរក្សាទុកថាមពលមួយចំនួនសម្រាប់ ឈីប Bluetooth ដែលអាចឲ្យវាដំណើរការបានរយៈពេលប៉ុន្មានម៉ោង ទោះបីជាថ្មទូរសព្ទអស់ក៏ដោយ។ ហេតុនេះទើបវាអាចបន្តរាយការណ៍ពីទីតាំងរបស់ខ្លួនបាន៕