ក្រុមហ៊ុន Apple បានបង្ហាញចេញលទ្ធផលហិរញ្ញវត្ថុសម្រាប់ត្រីមាសដំបូងនៃឆ្នាំ២០២៤នេះ ដែលស្ដែងឲ្យឃើញថាចំណូលពីការលក់ iPhone បានថយចុះ ១០% ខណៈចំណូលពីផ្នែកសេវាកម្មបានឈានដល់ចំណុចខ្ពស់បំផុតជាមួយកំណើន ១៤%។
ចំណូលសរុបដែល Apple ទទួលបានក្នុងពេលបីខែដំបូងនៃឆ្នាំ២០២៤នេះ គឺមានសរុប ៩០,៧៥ពាន់លានដុល្លារ ជាការថយចុះ ៤%។ ក្នុងនោះដែរ ប្រាក់ចំណេញមានចំនួន ២៣,៦៣ពាន់លានដុល្លារ ដែលមានការថយចុះផងដែរ បើធៀបនឹងពេលដូចគ្នាកាលពីឆ្នាំមុន។
បើតាមរបាយការណ៍ Apple ការលក់មានការថយចុះនៅទូទាំងទ្វីបអាស៊ី ជាពិសេសគឺនៅប្រទេសចិន តៃវ៉ាន់ ហុងកុង ជប៉ុន នៅទូទាំងតំបន់អាស៊ីប៉ាស៊ីហ្វិក ខណៈនៅតំបន់អាមេរិក និងអឺរ៉ុប ឃើញមានការផ្លាស់ប្ដូរតិចតួចប៉ុណ្ណោះ។
ផ្នែកសេវាកម្មរបស់ Apple ដែលរួមមានសេវាកម្មសមាជិកបង់ប្រាក់ប្រចាំខែ ការធានារ៉ាប់រង និងកិច្ចព្រមព្រៀងជាមួយក្រុមហ៊ុន Search Engine ជាដើម។ ផ្នែកនេះអាចស្វែងរកចំណូលបានដល់ទៅ ២៣,៩ពាន់លានដុល្លារ ហើយ Apple រំពឹងថានៅត្រីមាសបន្ទាប់ ផ្នែកនេះនឹងកើនឡើងចំណូលជាភាគរយពីរខ្ទង់បន្ថែមទៀត៕