កាលពីឆ្នាំមុនក្រុមហ៊ុនផលិតរថយន្តអគ្គិសនី Nio បានប្រកាសចេញស្មាតហ្វូនផ្ទាល់ខ្លួនជាលើកដំបូង ហើយពេលនេះដល់វេនក្រុមហ៊ុនរថយន្ត Polestar វិញម្ដង ដោយក្រុមហ៊ុនបានប្រកាសចេញជាផ្លូវការនូវស្មាតហ្វូនដំបូងឈ្មោះថា Polestar Phone។
Polestar Phone ត្រូវបានផលិតដោយក្រុមហ៊ុនទូរសព្ទចិន Meizu ដែលវាបានបង្កើតឡើងផ្អែកតាមស្មាតហ្វូនម៉ូដែល Meizu 21 Pro ដែលបានបង្ហាញចេញកាលពីខែកុម្ភៈកន្លងទៅ។ គួរដឹងថា Polestar និង Meizu ស្ថិតក្រោមការកាន់កាប់របស់ក្រុមហ៊ុនមេតែមួយគឺក្រុមហ៊ុន Geely។
ស្មាតហ្វូននេះប្រើឈីប Snapdragon 8 Gen 3 ជាមួយអេក្រង់ ៦,៧៩អ៊ីញ បង្ហាញរូបភាពកម្រិត 1368×3192 និងជាអេក្រង់ OLED LTPO 120Hz អាចបញ្ចេញពន្លឺបាន 1850nits ដែលលើអេក្រង់ក៏មានទ្រនាប់ស្កេនម្រាមដៃផងដែរ។ វាមាន RAM 16GB ជាមួយអង្គផ្ទុក 1TB និងប្រើប្រព័ន្ធកាមេរ៉ា៣គ្រាប់នៅខាងក្រោយ, មានកាមេរ៉ា Selfie ទំហំ 32MP និងមានថ្មទំហំ 5050mAh ដែលសាកកម្លាំង 80W ប្រើខ្សែ, កម្លាំង 50W ឥតខ្សែ និងកម្លាំង 10W ពេលសាកឲ្យឧបករណ៍ដទៃ។
ពិតណាស់ថាចំណុចទាក់ទាញសំខាន់នៃស្មាតហ្វូននេះគឺការផ្សារភ្ជាប់ជាមួយនឹងរថយន្ត Polestar ដោយបច្ចុប្បន្នអាចប្រើប្រាស់បានតែជាមួយរថយន្ត Polestar 4 ប៉ុណ្ណោះ។ អ្នកប្រើប្រាស់នឹងអាចប្រើស្មាតហ្វូននេះធ្វើជាកូនសោឌីជីថលបញ្ជារថយន្ត រួមជាមួយមុខងារជាច្រើនទៀត៕