ក្រុមហ៊ុនគ្រោងនឹងប្រកាសចេញ iPad Pro និង iPad Air ថ្មីនៅដើមខែឧសភា។ នេះបើតាមដំណឹងចេញផ្សាយដោយស្ថាប័ន Bloomberg។ ដំណឹងនេះមកស្របពេលដែលដៃគូផ្គត់ផ្គង់នៅក្រៅប្រទេសរបស់ Apple កំពុងបង្កើនការផលិតផលិតផលថ្មីទាំងនេះ។
ប្រភពខាងលើបានពន្យល់ថា Apple សង្ឃឹមថានឹងអាចប្រកាសចេញ iPad ថ្មីនៅត្រឹមចុងខែមីនា ឬដើមខែមេសា ប៉ុន្តែ Apple កំពុងតែស្ថិតនៅក្នុងដំណាក់កាលនៃការបញ្ចប់ Software ថ្មីសម្រាប់ iPad ថ្មី។
បន្ថែមពីនេះ អេក្រង់ OLED ថ្មីរបស់ iPad Pro ក៏បានប្រឈមមុខនឹងបញ្ហាផលិតផងដែរ។ ប្រភពខាងលើកឡើងថា អេក្រង់ក្នុង iPad Pro ថ្មី ទាមទារឲ្យប្រើបច្ចេកទេសផលិតថ្មីដែលមានភាពស្មុគស្មាញ ជាហេតុផលឲ្យការប្រកាសចេញកាន់តែត្រូវពន្យារពេល។
គួរដឹងថា iPad Pro ថ្មីរំពឹងថានឹងប្ដូរទៅប្រើអេក្រង់ OLED ជំនួសវិញ ដែលមានរូបរាងស្ដើងជាងមុន និងមានបំពាក់ឈីប M3 ពីខាងក្នុង រួមជាមួយ Magic Keyboard និង Apple Pencil ថ្មីផងដែរ។ ចំណែក iPad Air នឹងមានជម្រើសអេក្រង់ ១២,៩អ៊ីញ ជាលើកដំបូង៕