ក្រុមហ៊ុន Samsung គ្រោងបង្កើនការប្រើប្រាស់បន្ទះឈីប Exynos របស់ខ្លួន លើស្មាតហ្វូន និង Tablet ត្រកូល Galaxy នៅក្នុងឆ្នាំ២០២៤នេះ ដើម្បីកាត់បន្ថយចំណាយលើការទិញឈីបពីក្រុមហ៊ុនដទៃ។
កាលពីឆ្នាំ២០២៣ ក្រុមហ៊ុន Samsung បានប្រើប្រាស់ឈីប Snapdragon របស់ក្រុមហ៊ុន Qualcomm លើគ្រប់ម៉ូដែលទាំងអស់នៃ S23 Series។ ជាលទ្ធផលការចំណាយលើបន្ទះឈីបកាលពីឆ្នាំ២០២២ របស់ Samsung បានកើនឡ់ងជិត ៥០% ពីប្រមាណ ៥,៧ពាន់លានដុល្លារ ឡើងដល់ ៨,៥ពាន់លានដុល្លារ។
Samsung បានវិលមកប្រើឈីប Exynos សម្រាប់ត្រកូល Galaxy S24 និង Galaxy S24 Plus លើទីផ្សារមួយចំនួន ខណៈម៉ូដែល Ultra នៅតែប្រើប្រាស់ឈីប Snapdragon ទាំងស្រុង។ វាបានជួយឲ្យ Samsung រក្សាការចំណាយលើបន្ទះឈីបនៅកម្រិតថេរមួយ ដោយមានប្រមាណ ៨,៨ពាន់លានដុល្លារ ប៉ុណ្ណោះ។
ក្រៅពី Galaxy S24 Series ក្រុមហ៊ុន Samsung ក៏ចាប់ផ្ដើមប្រើឈីប Exynos លើម៉ូដែលផ្សេងៗទៀតដែរ ដូចជា Galaxy A35 ដែលទើបប្រកាសចេញថ្មីៗនេះ ប្រើប្រាស់ឈីប Exynos ទាំងដែលកាលពី Galaxy A34 ក្រុមហ៊ុនបានប្រើឈីប Dimensity 1080 របស់ក្រុមហ៊ុន MediaTek។ ចំណែក A25 ក៏បានប្ដូរពីឈីប MediaTek មកប្រើឈីប Exynos វិញផងដែរ៕