ប្រភពឲ្យដំណឹងលេចធ្លាយដ៏ល្បីឈ្មោះ Digital Chat Station បានចែករំលែកព័ត៌មានជាច្រើនអំពីស្មាតហ្វូនបត់ Xiaomi MIX Fold 4 ដោយវាមានការអភិវឌ្ឍកាន់តែខ្លាំងក្លាលើសជំនាន់មុន។
ប្រភពបានលើកឡើងអំពីស្នាមផ្នត់លើអេក្រង់មានតិចជាងមុន ជាមួយមុខងារទំនាក់ទំនងតាមផ្កាយរណប និងអាចមានអាវក្រោះការពារទឹក និងធូលី កម្រិតខ្ពស់ទៀតផង។ បន្ថែមពីនេះ Xiaomi ក៏ខិតខំទម្លាក់ទម្ងន់ MIX Fold 4 មកនៅចន្លោះ ២២០ ទៅ ២៤០ក្រាម ប៉ុណ្ណោះ។
MIX Fold 4 នឹងមានមកជាមួយនូវ RAM 16GB ប្រភេទ LPDDR5X និងអង្គផ្ទុក UFS 4.0 ទំហំ 1TB ហើយមានថ្មទំហំ 5000mAh ដែលអាចសាកភ្លើងកម្លាំង 100W។
កាមេរ៉ាក្រោយនឹងមាន Aperture ធំ ដោយកាមេរ៉ាគោលមានទំហំ 50MP ហើយវាអាចនឹងមានកាមេរ៉ា Zoom ពីរគ្រាប់ ជាមួយកាមេរ៉ា Ultrawide មួយគ្រាប់ ដូចនេះសរុបគឺមានកាមេរ៉ា ៤គ្រាប់នៅផ្នែកខាងក្រោយ។
Xiaomi MIX Fold 3 បានប្រកាសចេញកាលពីខែសីហាឆ្នាំមុន ហើយវាអាចទៅរួចដែល Xiaomi នឹងប្រកាសចេញ MIX Fold 4 ក្នុងពេលដូចគ្នា ដែលវាក៏ជាអំឡុងពេល Samsung ប្រកាសចេញស្មាតហ្វូនបត់របស់ខ្លួនផងដែរ៕