ស្មាតហ្វូន Nothing Phone (2a) បានប្រកាសចេញជាផ្លូវការ ដោយវាបានពាំនាំនូវចំណុចពិសេសភាគច្រើនរបស់ Nothing Phone (2) ក្នុងតម្លៃដែលធូរថ្លៃជាង។
មុននិយាយពីលក្ខណៈសម្បត្តិខាងក្នុង ងាកមកមើលរចនាបថស្មាតហ្វូននេះជាមុន ដោយវាមានប្រើប្រាស់ការរចនាបែបមើលធ្លុះដល់គ្រឿងក្នុងដូចដែល Nothing បានប្រើជាអត្តសញ្ញាណតាំងពីឆ្នាំ២០២០មក។ ចំណុចទាក់ទាញគឺផ្នែកកាមេរ៉ាខាងក្រោយ ដែលមើលទៅប្រៀបដូចជាភ្នែកយ៉ាងអ៊ីចឹង។
Nothing Phone (2a) មានប្រើប្រាស់ឈីប Dimensity 7200 Pro ដែលសហការបង្កើតឡើងជាមួយ MediaTek ដោយវាជាឈីបទំហំ 4nm និងមានកម្លាំងរត់ដល់ 2.8GHz ឯណោះ។
នៅផ្នែកខាងមុខមានអេក្រង់ ៦,៧៨អ៊ីញ ជាប្រភេទ 10-bit AMOLED អាចបង្ហាញរូបកម្រិត 1084x2412px អាចបាញ់ពន្លឺបាន 1300nits និងមាន Refresh Rate ចាប់ពី 30 ទៅ 120Hz។ ស្មាតហ្វូននេះប្រើប្រព័ន្ធប្រតិបត្តិការ Android 14 និងផ្ដល់ការអាប់ដេតបាន ៣ជំនាន់ ក៏ដូចជាអាប់ដេតសុវត្ថិភាពបាន ៤ឆ្នាំ។
កាមេរ៉ាបំពាក់លើស្មាតហ្វូននេះមានសរុប ៣គ្រាប់ ដោយនៅផ្នែកខាងក្រោយជាកាមេរ៉ាភ្លោះទំហំ 50MP ដូចគ្នា និងខាងមុខមានកាមេរ៉ា Selfie ទំហំ 32MP ដូចនៅលើ Nothing Phone (2) ដែរ។
Nothing Phone (2a) មានបំពាក់ថ្មទំហំដល់ 5000mAh អាចសាកល្បឿន 45W ដែលសាក ៥០% ក្នុងពេល ២៣នាទី និងសាក ១០០% ក្នុងពេល ៥៩នាទី។ Nothing និយាយថា ថ្មរបស់វាអាចនៅមានសុខភាព ៩០% ក្រោយសាក ១០០០ដង ឬក្រោយឆ្លងកាត់ការប្រើជាប្រចាំរយៈពេល ៣ឆ្នាំ។
Nothing Phone (2a) មានពីរជម្រើស 8GB RAM /128GB ROM ដែលមានតម្លៃប្រមាណ ៣៥៦ដុល្លារ នៅអឺរ៉ុប និងមួយទៀតគឺ 12GB RAM / 256GB ROM ដែលមានតម្លៃប្រមាណ ៤១១ដុល្លារ លើទីផ្សារអឺរ៉ុប៕