ក្រុមហ៊ុន Apple បានប្រកាសចេញ MacBook Air ជំនាន់ថ្មីទំហំ ១៣អ៊ីញ និង ១៥អ៊ីញ ដោយមានប្រើប្រាស់ឈីប M3 ហើយម៉ូដែលទាំងពីរគឺមានទទួលការកុម្ម៉ង់ទិញចាប់ពីពេលនេះសម្រាប់ទីផ្សារអាមេរិក ជាមួយការដឹកជញ្ជូនចាប់ផ្ដើមនាថ្ងៃទី៨ ខែមីនា នេះ។
ឡេបថបថ្មីនេះមានប្រើប្រាស់ឈីប M3 ដែលមាន CPU និង GPU លឿនជាងមុន ជាមួយ Neural Engine ដែលទទួលបានការដុសខាត់កាន់តែខ្លាំង និងមាន Wi-Fi ដែលល្បឿនលឿនជាងមុន ២ដង។ ឈីបថ្មីនេះ គាំទ្រការតភ្ជាប់ជាមួយអេក្រង់បន្ថែមបានដល់ទៅពីរក្នុងពេលតែមួយ ខណៈពីមុនគឺបានតែមួយប៉ុណ្ណោះ។
Apple បានហៅ MacBook Air ថ្មីទាំងពីរ ថាជាកុំព្យូទ័រទូទៅដ៏ខ្លាំងជាងគេសម្រាប់បច្ចេកវិទ្យា AI នេះក៏ដោយសារតែមាន Neural Engine 16-core ដែលលឿនជាងមុន ខណៈដែល Wi-Fi គឺជាបច្ចេកវិទ្យា 6E។
សម្រាប់រូបរាងមិនមានការផ្លាស់ប្ដូរឡើយ ហើយតម្លៃរបស់ MacBook Air ១៣អ៊ីញ មានចាប់ពី ១០៩៩ដុល្លារ និង MacBook Air ១៥អ៊ីញ មានតម្លៃចាប់ពី ១២៩៩ដុល្លារ ដែលតម្លៃនេះហាក់មិនបានឡើងថ្លៃឡើយបើធៀបនឹងប្រភេទប្រើឈីប M2៕