ក្រុមហ៊ុន Apple បានចំណាយជាង ១០ពាន់លានដុល្លារ ដើម្បីធ្វើការលើរថយន្តអគ្គិសនី នៅក្នុងរយៈពេល១០ឆ្នាំកន្លងមកនេះ។ នេះបើតាមការចុះផ្សាយរបស់ The New York Times។
ទឹកប្រាក់នេះបានចំណាយលើការស្រាវជ្រាវ និងអភិវឌ្ឍន៍ ក៏ដូចជាចំណាយលើវិស្វករ Apple និងអ្នកជំនាញលើរថយន្ត រាប់ពាន់នាក់។ បុគ្គលិកមួយចំនួននៅក្រុមហ៊ុន Apple និយាយថាពួកគេសង្ស័យថាគម្រោងការនេះទំនងជាបរាជ័យតាំងពីពេលចាប់ផ្ដើមដំបូងមកម្ល៉េះ ហើយពួកគេបានហៅគម្រោងការនេះថាជា មហន្តរាយកប៉ាល់ទីតានិច ជាអ្នកហៅឈ្មោះសម្គាល់ថាគម្រោងការ Titan។
ការអភិវឌ្ឍកន្លងមកនេះ Apple មិនអាចស្វែងរកបាននូវមេដឹកនាំមកកាន់កាប់គម្រោងការនេះទេ ដោយរយៈពេល១០ឆ្នាំកន្លងមក គម្រោងការនេះបានប្ដូរមេដឹកនាំចំនួន ៤រូប និងបានកាត់បន្ថយ ក៏ដូចជាបង្កើនធនធានមនុស្សចុះឡើងៗ។ បើតាម The New York Times ហេតុផលនៅពីក្រោយបរាជ័យនេះ គឺដោយសារ Apple មិនអាចបង្កើត Software និងរូបមន្តសម្រាប់រថយន្តបើកបរស្វ័យប្រវត្តិ៕