ក្រុមហ៊ុន Samsung បានបង្ហាញចេញព័ត៌មានកាន់តែច្រើនអំពីចិញ្ចៀនវៃឆ្លាត Galaxy Ring ប៉ុន្តែតម្លៃលក់ និងកាលបរិច្ឆេទចេញលក់លើទីផ្សារនៅជាមន្ទិលនៅឡើយ។
Galaxy Ring នឹងមានដាក់លក់ក្នុងទំហំសហរដ្ឋអាមេរិក មានចាប់ពីលេខ ៥ ដល់ ១៣ ដោយក្នុងចិញ្ចៀននឹងមានសរសេរអក្សរ S ដល់ XL នៅពីផ្នែកខាងក្នុង។ ចិញ្ចៀនវៃឆ្លាតនេះនឹងមានលក់ជាមួយជម្រើសពណ៌ចំនួនបី រួមមានពណ៌ខ្មៅ ពណ៌ប្រាក់ និងពណ៌មាស។
ចិញ្ចៀនរបស់ Samsung មួយនេះ អាចប្រើដើម្បីតាមដានចង្វាក់បេះដូង តាមដានចង្វាក់ដង្ហើម តាមដានដំណេក តាមដានសកម្មភាពក្នុងដំណេក និងថែមទាំងអាចដឹងអំពីរោគសញ្ញានៃជំងឺស្ទះដង្ហើមពេលគេងផងដែរ។ Samsung បាននិយាយថា Galaxy Ring ប្រើជាគូជាមួយ Galaxy Watch គឺជួយបង្កើនគុណភាពនៃការតាមដានសុខភាព និងសកម្មភាព ២៤ម៉ោង លើ២៤ម៉ោង។
Galaxy Ring នឹងចេញលក់ដោយអាចដំណើរការជាមួយតែឧបករណ៍ស្មាតហ្វូនរបស់ Samsung ប៉ុណ្ណោះ ហើយសម្រាប់ការប្រើជាមួយឧបករណ៍ Android ផ្សេងទៀត នឹងត្រូវពង្រីកតាមពេលក្រោយ៕