ក្នុងកិច្ចសន្ទនាជាមួយ Morning Brew នាយកប្រតិបត្តិក្រុមហ៊ុន Meta លោក Mark Zuckerberg បានចែករំលែកអំពីហេតុផលនៅពីក្រោយការបញ្ឈប់បុគ្គលិកដែលកើតមាននៅតាមក្រុមហ៊ុនបច្ចេកវិទ្យាធំ រួមទាំងក្រុមហ៊ុនរបស់ខ្លួនផងដែរ។
លោក Mark Zuckerberg បានឲ្យដឹងថាហេតុផលចម្បងនៃការកាត់បន្ថយបុគ្គលិកគឺដោយសារតែជំងឺរាតត្បាតកូវីដ១៩ ព្រោះថាអំឡុងផ្ទុះជំងឺនេះ ក្រុមហ៊ុនជាច្រើនបានបង្កើនចំនួនបុគ្គលិកក្រោយពីប្រាក់ចំណូលមានការកើនឡើង។
ប៉ុន្តែក្រោយពីស្ថានភាពត្រឡប់មកដូចដើមវិញ ហើយសេដ្ឋកិច្ចពិភពលោកប្រែជាដុនដានផងនោះ ក្រុមហ៊ុនបច្ចេកវិទ្យាជាច្រើនរួមទាំង Meta បានដឹងខ្លួនថាពួកគេបានជួលបុគ្គលិកច្រើនជ្រុលពេក និងតម្រូវឲ្យមានការកាត់បន្ថយខ្លះ។
នាយកប្រតិបត្តិរូបនេះបានឲ្យដឹងដែរថា ការកាត់បន្ថយបុគ្គលិកនេះ ត្បិតថាជារឿងដ៏ឈឺចាប់មួយ ប៉ុន្តែវាផ្ដល់ជាផលប្រយោជន៍ជាច្រើនដល់ក្រុមហ៊ុន។ ជាក់ស្ដែងក្រោយការកាត់បន្ថយបុគ្គលិក ១ម៉ឺននាក់ ក្រុមហ៊ុន Meta បានសង្កេតឃើញពីការវិលត្រឡប់មកវិញនូវប្រាក់ចំណេញចំនួនច្រើន ហើយក្រុមហ៊ុនថែមទាំងបានឈានដល់ចំណុចកំពូលនៃតម្លៃលើទីផ្សារផងដែរ៕