បន្ទះឈីប Exynos របស់ Samsung បានវិលត្រឡប់មកវិញ ជាមួយ Galaxy S24 Series ដោយ Galaxy S24 ឬ S24+ ដែលលក់នៅអឺរ៉ុប អង់គ្លេស ឥណ្ឌា និងនៅតំបន់ដទៃទៀតក្រៅពីអាមេរិក កាណាដា ចិន តៃវ៉ាន់ និងហុងកុង គឺទទួលបានបន្ទះឈីប Exynos 2400។ ដោយឡែកសម្រាប់ S24 Ultra មានប្រើផ្ដាច់មុខនូវឈីប Snapdragon 8 Gen 3 for Galaxy។
រវាងបន្ទះឈីបទាំងពីរនេះ អ្នកប្រើប្រាស់មួយចំនួនប្រហែលជាដឹងច្បាស់ថាវាមិនមានភាពដូចគ្នានោះទេ ទាំងល្បឿន និងសមត្ថភាពនៃការកាន់ថ្មគឺសុទ្ធតែ Snapdragon 8 Gen 3 for Galaxy នាំមុខ Exynos 2400។
ជាក់ស្ដែងបើតាមការធ្វើតេស្តរបស់គណនី YouTube មួយបានបង្ហាញថា S24 ប្រើឈីប Snapdragon 8 Gen 3 for Galaxy អាចកាន់ថ្មបានរយៈពេល ៦ម៉ោង និង ៥៤នាទី ឯ S24 ប្រើឈីប Exynos 2400 ទ្រាំទ្របាន ៦ម៉ោង និង ២០នាទី ប៉ុណ្ណោះ។ ការធ្វើតេស្តក៏បានប្រៀបធៀបជាមួយ S23 ប្រើឈីប Snapdragon 8 Gen 2 for Galaxy ដែលបង្ហាញថាវាអាចទ្រាំទ្របាន ៦ម៉ោង និង ២៣នាទី ប្រសើរជាង S24 ប្រើឈីប Exynos 2400 ចំនួន ៣នាទី។
