ការបង្ហោះសារលើបណ្ដាញសង្គមពីសំណាក់អតិថិជន Vision Pro មួយចំនួន បានបង្ហាញថាពួកគេបានចាប់ផ្ដើមលក់ឧបករណ៍នេះទៅឲ្យ Apple វិញ។
អ្នកប្រើម្នាក់ឈ្មោះថា Parker Otolani បានរៀបរាប់ថា ការសម្រេចចិត្តលក់ឧបករណ៍ឲ្យ Apple វិញ គឺដោយសារឧបករណ៍នេះមិនមានផាសុកភាពពេលពាក់លើក្បាល និងធ្វើឲ្យរូបលោកឈឺភ្នែកផងដែរ។ យ៉ាងណារូបគេនិយាយថា Vision Pro ជាឧបករណ៍អនាគត ហើយលោកនឹងប្រើវាម្ដងទៀតនៅពេលដែលបញ្ហាផាសុកភាពពេលពាក់ប្រើត្រូវបានដោះស្រាយ។
អ្នកប្រើប្រាស់ផ្សេងទៀតបានរៀបរាប់ថាដែរថា ក្រោយប្រើប្រាស់ Vision Pro បាន១០នាទី ចាប់ផ្ដើមមានអារម្មណ៍ថាឈឺក្បាលដែលពិបាកនឹងទ្រាំ ហើយអ្នកខ្លះទៀតក៏មានហេតុផលស្រដៀងគ្នានេះដែរ ដោយភាគច្រើនគឺទាក់ទងនឹងផាសុកភាពនៅពេលប្រើ។
គួរដឹងថាឧបករណ៍ Vision Pro មានទម្ងន់ប្រមាណ ៦០០ ទៅ ៦៥០ក្រាម ដែលទម្ងន់នេះគឺធ្ងន់គួរសមបើធៀបទៅនឹងឧបករណ៍ VR Headset ផ្សេងៗទៀត ដូចជា Meta Quest 3 មានទម្ងន់ ៥១៥ក្រាម៕