ស្មាតហ្វូន OnePlus 12R ជាស្មាតហ្វូនលំដាប់ថវិកាដ៏ទាក់ទាញមួយជាមួយលក្ខណៈសម្បត្តិខ្ពស់ ប៉ុន្តែមានតម្លៃត្រឹម ៤៩៩ដុល្លារ។ យ៉ាងណាក្ដី មានចំណុចមួយពីស្មាតហ្វូននេះ ដែលមិនពិតដូចអ្វីដែល OnePlus បានលើកឡើងពេលប្រកាសចេញដំបូង។
តាមរយៈការប្រកាស និងពេលចាប់ផ្ដើមទទួលការកុម្ម៉ង់ទិញសម្រាប់ OnePlus 12R នេះ វិបសាយរបស់ OnePlus បានបញ្ជាក់ថាស្មាតហ្វូននេះមានមេម៉ូរីប្រភេទ UFS 4.0។ មេម៉ូរីនេះគឺមានល្បឿនលឿនជាង UFS 3.1 ដែលអាចធ្វើឲ្យស្មាតហ្វូនកាន់តែរលូនជាងមុន។
យ៉ាងណាក្ដី ក្នុងសារសូមទោសមួយដែលបង្ហោះលើវិបសាយ OnePlus បានបញ្ជាក់ថាគ្រប់ប្រភេទនៃ OnePlus 12R គឺបានបំពាក់មកជាមួយ UFS 3.1 ប៉ុណ្ណោះ។
OnePlus បានពន្យល់ថា ពេលប្រកាសចេញ OnePlus 12R ពួកគេបានប្រកាសអំពីមុខងារ Trinity Engine ជារូបមន្ត Software មួយដែលធ្វើឲ្យមេម៉ូរីនៃស្មាតហ្វូនដំណើរការលឿន និងរលូនល្អ។ ដោយសារបញ្ហាបច្ចេកទេស OnePlus បែរជាលើកឡើងថាមេម៉ូរីដែលមានមុខងារ Trinity Engine នេះគឺជា UFS 4.0 ទៅវិញ៕