[ទីផ្សារបរទេស] រថយន្តអគ្គិសនី Kia EV5 បានបង្ហាញវត្តមានជាផ្លូវការនៅទីផ្សារប្រទេសចិន ជាមួយតម្លៃដែលធូរថ្លៃច្រើន បើធៀបទៅនឹងគូប្រជែងដូចជា Tesla Model Y ជាដើម។
Kia EV5 លក់នៅប្រទេសចិន មានចែកចេញជាបីប្រភេទ រួមមានប្រភេទ 530 Light តម្លៃ ២០ ៩០០ដុល្លារ, ប្រភេទ 530 Air តម្លៃ ២២ ៣០០ដុល្លារ និងប្រភេទ 530 Land មានតម្លៃ ២៤ ៤០០ដុល្លារ។ ធៀបនឹង Tesla Model Y ដែលជាគូប្រជែង មានលក់តម្លៃចាប់ពី ៣៧ ០០០ដុល្លារ ឡើងទៅ លើទីផ្សារប្រទេសចិន។
ប្រភេទ 530 Light មានបំពាក់អាគុយចំណុះ ៦៤,២kWh មានម៉ូទ័រអគ្គិសនីមួយអាចផលិតកម្លាំងបាន ២១៥សេះ និងបើកបរបានចម្ងាយ ៥៣០គ.ម។ យ៉ាងណា Kia មិនបានប្រាប់ពីភាពខុសគ្នារវាងប្រភេទ Light, Air ឬ Land នោះទេ ប៉ុន្តែតាមរយៈលេខកូដ 530 មានន័យថាវាប្រើប្រាស់ប្រព័ន្ធថាមពលតែមួយ។
អតិថិជនដែលចង់បានកម្លាំង និងចម្ងាយបើកបរឆ្ងាយ អាចរើសយករថយន្ត Kia EV5 ដែលមានអាគុយចំណុះ ៨៨kWh អាចផលិតកម្លាំងបាន ២១៥សេះ និងបើកបរបានចម្ងាយ ៧២០គ.ម៕