ធនាគារកណ្តាលថៃ (Bank of Thailand) បានបន្ធូរបន្ថយច្បាប់បន្ថែមទៀត លើកម្មវិធីប្រាក់កម្ចីទន់ចំនួន ៥០០ ពាន់លានបាតរបស់ខ្លួន ក្នុងគោលបំណងជួយក្រុមហ៊ុនតូចៗ ទប់ទល់នឹងផលប៉ះពាល់នៃជំងឺរាតត្បាតកូវីដ១៩។
នៅក្នុងសេចក្តីថ្លែងការណ៍មួយ ចេញកាលពីថ្ងៃច័ន្ទ ទី២៨ ខែធ្នូ ឆ្នាំ២០២០ នេះ ដោយផ្អែកលើស្ថានភាពកូវីដ១៩ ដែលបានអូសបន្លាយពេលទាំងក្នុងស្រុក និងអន្តរជាតិ បានឲ្យដឹងថា សហគ្រាសធុនតូច និងមធ្យមមួយចំនួននៅតែមានប្រាក់ចំណូលមិនគ្រប់គ្រាន់ ដើម្បីទ្រទ្រង់អាជីវកម្មរបស់ពួកគេ។
ធនាគារកណ្តាលថៃ បានកែសំរួលនិយមន័យរបស់ក្រុមអាជីវកម្មដែលមានសិទ្ធិស្វែងរកថវិកា ដើម្បីផ្តល់ឲ្យសហគ្រាសធុនតូច និងមធ្យម មានភាពងាយស្រួលក្នុងកម្មវិធីដែលបានចាប់ផ្តើមនៅក្នុងខែមេសា ដែលជាផ្នែកមួយនៃកញ្ចប់ឆ្លើយតបនឹងជំងឺកូវីដ១៩។
ក្នុងនោះផងដែរ ធនាគារកណ្តាលថៃ ក៏បានអនុញ្ញាតឲ្យសហគ្រាសធុនតូច និងមធ្យម ដាក់ពាក្យស្នើសុំថវិកាចំនួនពីរដង មុនថ្ងៃទី ១៨ ខែមេសា ឆ្នាំក្រោយ។
រហូតមកដល់ពេលនេះ កម្មវិធីប្រាក់កម្ចីមានភាពយឺតយ៉ាវក្នុងការទទួលបានការចាប់អារម្មណ៍ ដោយសារតែ លក្ខខណ្ឌផ្តល់ប្រាក់កម្ចីតឹងតែង។ យ៉ាងណាក៏ដោយ គិតត្រឹមពេលនេះ ធនាគារកណ្តាលថៃ បានអនុម័តប្រាក់កម្ចីប្រមាណ ១២៣ ពាន់លានបាតរួចមកហើយ៕