វិបសាយលក់ឡានអង់គ្លេស រកលុយចំណេញបាន ២០១លានដុល្លារ ក្នុងពេល៦ខែ

[ទីផ្សារបរទេស] វិបសាយលក់រថយន្តតាមអនឡាញដ៏ល្បីឈ្មោះរបស់អង់គ្លេស Auto Trader Group ឃើញប្រាក់ចំណេញមានការកើនឡើងជាថ្មីម្ដងទៀតក្នុងរយៈពេលឆមាសដំបូងនៃអាជីវកម្មរបស់ខ្លួន ទោះបីជាសេដ្ឋកិច្ចពិភពលោកកំពុងជួបបញ្ហាក្ដី។

ពាណិជ្ជកម្ម

ក្រុមហ៊ុន Auto Trader បានចេញផ្សាយរបាយការណ៍សម្រាប់រយៈពេល៦ខែ ដែលគិតត្រឹមចុងខែកញ្ញា ជាមួយប្រាក់ចំណេញ និងប្រាក់ចំណូល សុទ្ធតែមានការកើនឡើង បើធៀបនឹងពេលដូចគ្នាកាលពីឆ្នាំមុន។

ឯកសារបង្ហាញថា ប្រាក់ចំណេញមុនគិតពន្ធមានការកើនឡើង ១០% ដោយអាចរកប្រាក់ចំណេញបាន ២០១លានដុល្លារ ធៀបនឹង ១៨៣,៣លានដុល្លារ ដែលរកបានកាលពីឆ្នាំមុនក្នុងអំឡុងពេលដូចគ្នា។ ក្នុងនោះដែរ ប្រាក់ចំណូលមានការកើនឡើង ១២% ដោយមានចំនួន ៣៤៧លានដុល្លារ។

ក្នុងអំឡុងឆមាសដំបូងរបស់ Auto Trader Group ឃើញថា ៧៥% នៃនាទីសរុបដែលអ្នកប្រើប្រាស់បានចំណាយលើវិបសាយរបស់ពួកគេ គឺជារយៈពេលដែលអ្នកប្រើប្រាស់បានចាយប្រាក់លើវិបសាយ។ គួរដឹងដែរថា ចំនួនចូលមើលជាមធ្យមប្រចាំខែលើវិបសាយ Auto Trader គឺមានការកើនឡើង ១៤% ដែលឡើងដល់ ៧៧លានមើល ក្នុងមួយខែ និងមានរយៈពេលទស្សនាសរុប ៥៥៥លាននាទី ក្នុងមួយខែ។

ទន្ទឹមគ្នានោះ ការទូទាត់លើរថយន្តមួយទឹកលើវិបសាយ Auto Trader មានការកើនឡើងចំនួន ៥% ហើយការតម្លៃជាមធ្យមនៃរថយន្តមួយទឹកនេះដែរ មានការកើនឡើង ២% ដែលបានឡើងដល់តម្លៃ ២២ ០០០ដុល្លារ៕

ប្រភព