[ទីផ្សារបរទេស] ទីបំផុតក្រុមហ៊ុន Toyota បានប្រកាសចេញជាផ្លូវការនូវរថយន្ត Camry ជំនាន់ថ្មី ជាស៊េរីឆ្នាំ២០២៥ ដែលមានដូររូបរាងថ្មី និងបានលុបចោលជម្រើសម៉ាស៊ីនប្រេងឥន្ធនៈសុទ្ធ ដោយមានតែជម្រើសម៉ាស៊ីន Hybrid ប៉ុណ្ណោះ។
រថយន្ត Camry ឆ្នាំ២០២៥ ដែលមានតែជម្រើស Hybrid នេះ គឺមានទាំងប្រព័ន្ធបើកបរ FWD និង AWD ដោយវាប្រើម៉ាស៊ីន ២,៥លីត្រ ៤ស៊ីឡាំង អមជាមួយម៉ូទ័រអគ្គិសនីភ្លោះ ដោយប្រភេទ FWD ផលិតកម្លាំងបាន ២២៥សេះ និងប្រភេទ AWD ផលិតកម្លាំងបាន ២៣២សេះ។
ក្រឡេកមើលរូបរាងរបស់ Camry ជំនាន់ថ្មីនេះ ហាក់ទទួលបានឥទ្ធិពលមួយចំនួនពីរថយន្ត Toyota Crown ហើយផ្នែកខាងមុខផ្ទាល់មានការឌីហ្សាញដែលប្រៀបដូចជារថយន្ត Crown និងរថយន្ត Prius រួមបញ្ចូលគ្នា ហើយផ្នែកខាងក្នុងឯណោះក៏មានការផ្លាស់ប្ដូរស្រដៀងនឹងរថយន្ត Crown ផងដែរ។
Camry ស៊េរីឆ្នាំ២០២៥ គ្រប់ប្រភេទ នឹងចេញលក់ដោយមានប្រព័ន្ធបញ្ឆេះដោយមិនប្រើសោរ, ម៉ាស៊ីនត្រជាក់ពីរតំបន់, ដុំសាកទូរសព្ទឥតប្រើខ្សែ នោងមុខងារសុវត្ថិភាពជាច្រើន ដែលក្នុងនោះរួមមាន blind-spot monitoring រួម rear cross-traffic alert មកជាមួយផងដែរ។ ប៉ុន្តែប្រភេទ LE និង SE ប្រើប្រាស់កុងទ័រឌីជីថល ៧អ៊ីញ និងអេក្រង់ Touch ទំហំ ៨អ៊ីញ ឯប្រភេទ XLE និង XSE មានអេក្រង់ទំហំ ១២,៣អ៊ីញ ចំនួនពីរ។
Camry ស៊េរីថ្មីនេះ អាចនឹងមានលក់នៅតាមហាងចែកចាយរថយន្ត Toyota នៅអាមេរិក ក្នុងអំឡុងត្រីមាសទីពីរ ដោយតម្លៃនឹងត្រូវប្រកាសចេញពេលដែលជិតចេញលក់ជាផ្លូវការ។ ទាក់ទងនឹងតម្លៃនេះ រំពឹងថានឹងមានការកើនឡើង ព្រោះថាពេលនេះម៉ាស៊ីន Hybrid គឺមានជាស្តង់ដារតែម្ដង៕