រដ្ឋាភិបាលជប៉ុនបាននិយាយកាលពីថ្ងៃសុក្រ ទី២៥ ធ្នូ ថា ប្រទេសរបស់ខ្លួនមានគោលបំណងលុបបំបាត់យានយន្តដើរដោយប្រេងសាំង ក្នុងរយៈពេល ១៥ ឆ្នាំខាងមុខ នៅក្នុងផែនការមួយដើម្បីឈានដល់ “ការបំភាយកាបូនសូន្យសុទ្ធ” (net zero carbon emissions)។
“យុទ្ធសាស្ត្រកំណើនបៃតង” (green growth strategy) ដែលផ្តោតលើឧស្សាហកម្មអ៊ីដ្រូសែន និងរថយន្ត គឺមានន័យថាជាផែនការសកម្មភាពមួយដើម្បីសម្រេចឲ្យបាននូវការសន្យាកាលពីខែតុលា របស់លោកនាយករដ្ឋមន្ត្រី Yoshihide Suga ក្នុងការលុបបំបាត់ការបំភាយកាបូន នៅលើមូលដ្ឋានសុទ្ធមួយត្រឹមពាក់កណ្តាលឆ្នាំ ២០៣០។
លោក Suga បានចាត់ទុកការវិនិយោគបៃតង (green investment) ជាអាទិភាពកំពូល ដើម្បីជួយស្តារសេដ្ឋកិច្ចដែលរងគ្រោះដោយជំងឺរាតត្បាតកូវីដ១៩ និងដើម្បីនាំប្រទេសជប៉ុនចូលទៅក្នុងសហគមន៍អឺរ៉ុប ចិន និងសេដ្ឋកិច្ចដទៃទៀតដែលកំណត់គោលដៅបំភាយឧស្ម័ន (emissions targets)។
គួរឲ្យដឹងថា រដ្ឋាភិបាលជប៉ុននឹងផ្តល់ការលើកទឹកចិត្តពន្ធ និងជំនួយហិរញ្ញវត្ថុផ្សេងទៀតដល់ក្រុមហ៊ុន ដោយកំណត់គោលដៅ ៩០ ពាន់ពាន់លានយ៉េន (៨៧០ ពាន់លានដុល្លារ) ក្នុងមួយឆ្នាំក្នុងកំណើនសេដ្ឋកិច្ច បន្ថែមតាមរយៈការវិនិយោគ និងការលក់បៃតង (green investment and sales) នៅឆ្នាំ ២០៣០ និង ១៩០ ពាន់ពាន់លានយ៉េន (១,៨ ពាន់ពាន់លានដុល្លារ) នៅឆ្នាំ ២០៥០។
មិនតែប៉ុណ្ណោះ មូលនិធិពណ៌បៃតង (green fund) ចំនួន ២ ពាន់ពាន់លានយ៉េន នឹងគាំទ្រដល់ការវិនិយោគសាជីវកម្មក្នុងបច្ចេកវិទ្យាបៃតង (green technology)៕