វៀតណាម នឹងដេញថ្លៃកុងតឺន័រចិន ២០០គ្រឿង ដែលទុកចោលមិនបានទាមទារវិញ

គយវៀតណាម នឹងដាក់លក់ដេញថ្លៃកុងតឺន័រចំនួន ២០០ គ្រឿង ដែលភាគច្រើនបានផ្ទុកទំនិញក្លែងក្លាយពីប្រទេសចិន ដែលនៅតែមិនមានការតវ៉ាទាមទារយកវិញ អស់រយៈពេល ៤ ខែមកហើយ។

ពាណិជ្ជកម្ម

ប្រធានគយ លោក Nguyen Van Can បាននិយាយនៅក្នុងកិច្ចប្រជុំមួយនាពេលថ្មីៗនេះថា បុគ្គល និងអាជីវកម្មបានបង្ហាញចំណាប់អារម្មណ៍ក្នុងការទិញកុងតឺន័រទាំងនោះ ប៉ុន្តែអាជ្ញាធរគយបានប្តេជ្ញាដេញថ្លៃជាសាធារណៈ។

គួរឲ្យដឹងថា កាលពីខែកញ្ញាកន្លងទៅនេះ អាជ្ញាធរបានរឹបអូសយកកុងតឺន័រនៅច្រកព្រំដែនអន្តរជាតិ Kim Thanh ក្នុងខេត្ត Lao Cai ហើយបានរកឃើញរបស់របរមួយចំនួនដូចជា សម្លៀកបំពាក់ដាក់ស្លាក “Made in Vietnam” និងម៉ាកល្បីៗ ដូចជា Gucci និង Adidas។

ក្នុងនោះក៏មានគ្រឿងអេឡិចត្រូនិចប្រើប្រាស់រួច ដូចជា ឧបករណ៍បំពងសំឡេង និងម៉ាស៊ីនត្រជាក់ ដែលការនាំចូលត្រូវបានហាមឃាត់។ គ្រឿងសំអាង ជើងមាន់ នំ និងថ្នាំចិនបុរាណ ដែលជាផលិតផលត្រូវបំពេញតាមលក្ខខណ្ឌជាក់លាក់ដើម្បីចូលប្រទេសវៀតណាម ក៏ត្រូវបានគេរកឃើញផងដែរ។

ចិន គឺជាប្រទេសនាំចេញធំជាងគេរបស់វៀតណាម ក្នុងរយៈពេល ១១ ខែដំបូង ជាមួយនឹងការនាំចេញចំនួន ៧៣,៩ ពាន់លានដុល្លារ កើនឡើងជិត ៨ ភាគរយពីមួយឆ្នាំទៅមួយឆ្នាំ៕