[ទីផ្សារបរទេស] រថយន្តម៉ូដែល Ramcharger របស់ក្រុមហ៊ុនជំនាញខាងផលិតរថយន្តភីកអាប់ Ram បានបង្ហាញវត្តមានជាថ្មីម្ដងទៀត ប៉ុន្តែការវិលត្រឡប់នេះគឺក្នុងនាមជារថយន្តភីកអាប់អគ្គិសនី ដែលមានប្រើម៉ាស៊ីនសាំងជាជំនួយ។
ចំណុចទាក់ទាញនៃរថយន្តភីកអាប់នេះ គឺត្រង់ដែលវាមានបំពាក់អាគុយ ៩២kWh ដែលផ្ដល់ថាមពលដល់ម៉ូទ័រអគ្គិសនីភ្លោះ ដើម្បីបង្វិលកង់ទាំងបួននៃរថយន្ត និងអាចបង្កើតបានជាកម្លាំង ៦៦៣សេះ។ ជាមួយកម្លាំងនេះ អាចឲ្យរថយន្ត 1500 Ramcharger ស្ទុះដល់ ៩៦គ.ម/ម៉ ក្នុងពេល ៤,៤វិនាទី។
ចាប់អារម្មណ៍កាន់តែខ្លាំងនោះគឺ រថយន្ត 1500 Ramcharger មានបំពាក់ម៉ាស៊ីនសាំងចំណុះ ៣,៦លីត្រ ៦ស៊ីឡាំង ដែលដើរតួជាម៉ាស៊ីនភ្លើង។ ម៉ាស៊ីនភ្លើងនេះ អាចសាកភ្លើងឲ្យអាគុយរថយន្ត ឬអាចធ្វើការជាមួយអាគុយ ដើម្បីផ្ដល់កម្លាំងអតិបរមាដល់កង់រថយន្ត។
ជាមួយការបំពាក់ម៉ាស៊ីនភ្លើងខ្នាតធំនេះ អាចឲ្យរថយន្តភីកអាប់អគ្គិសនីនេះ បើកបរបានចម្ងាយសរុបដល់ ១១១០គីឡូម៉ែត្រ ដែលឆ្ងាយជារថយន្តភីកអាប់អគ្គិសនីទូទៅ។ ជាមួយប្រព័ន្ធនេះដែរ ម្ចាស់រថយន្តមិនបាច់បារម្ភពីរឿងរកកន្លែងសាកភ្លើងនោះឡើយ ព្រោះថាស្ថានីយប្រេងឥន្ធនៈគឺមានគ្រប់ទីកន្លែងទៅហើយ។
ចំណុចពិសេសផ្សេងទៀតនៃរថយន្តភីកអាប់នេះ មានដូចជាការដើរតួជាម៉ាស៊ីនភ្លើងកម្លាំង ៧,២kW ដើម្បីផ្គត់ផ្គង់ថាមពលអគ្គិសនីដល់ឧបករណ៍អគ្គិសនីផ្សេងៗ។ បន្ថែមពីនេះ ភីកអាប់នេះ មានសមត្ថភាពសាកភ្លើងលឿន ១៤៥kW ដែលសាក ១០នាទី អាចបើកបាន ៨០គីឡូម៉ែត្រ។
ព័ត៌មានលម្អិតដទៃទៀតអំពីរថយន្ត 1500 Ramcharger នឹងត្រូវប្រកាសចេញពេលដែលវាជិតចេញលក់ជាផ្លូវការ ដោយបច្ចុប្បន្ននេះក្រុមហ៊ុនបើកទទួលការកក់សម្រាប់អតិថិជននៅសហរដ្ឋអាមេរិក៕