នាយកប្រតិបត្តិក្រុមហ៊ុន Volkswagen Group លោក Herbert Diess ជឿជាក់ថា ក្រុមហ៊ុនបច្ចេកវិទ្យាយក្ស Apple កំពុងបង្កើតបញ្ហាប្រឈមជាច្រើនសម្រាប់ក្រុមហ៊ុនផលិតរថយន្ត ជាងគូប្រជែងរបស់ខ្លួនទៅទៀត។
ថ្មីៗនេះ យោងទៅតាមសារព័ត៌មាន Bloomberg បានឲ្យដឹងថា មេក្រុមហ៊ុន Volkswagen បានឆ្លើយតបនៅពេលដែលគេសួរពាក់ព័ន្ធនឹងក្រុមហ៊ុន Apple កំពុងអភិវឌ្ឍន៍រថយន្ត ថា “យើងទន្ទឹងរង់ចាំគូប្រជែងថ្មី ដែលប្រាកដជានឹងពន្លឿនការផ្លាស់ប្តូរនៅក្នុងឧស្សាហកម្មរបស់យើង និងនាំមកនូវជំនាញថ្មីៗ”។
“ខ្ញុំធ្លាប់បាននិយាយរួចមកហើយថា ក្រុមហ៊ុនដែលមានតម្លៃបំផុតនៅលើពិភពលោក នឹងងាកមកផលិតយានយន្ត។ វាអាចជាក្រុមហ៊ុន Tesla, Apple ឬ Volkswagen”។ នេះបើតាមលោក Diess បានបន្ថែម។
គួរឲ្យដឹងដែរថា ថ្មីៗនេះ Apple បានអះអាងថា គម្រោងរថយន្ត “Project Titan” របស់ខ្លួន កំពុងដំណើរការឡើងវិញ ហើយអាចនឹងបង្ហាញខ្លួននៅឆ្នាំ ២០២៤។ យោងទៅតាមសារព័ត៌មាន Reuters បង្ហាញថា អាគុយរបស់រថយន្តនោះ អាចមានការរចនាបែប “monocell design” ទៀតផង៕
