ការទិញនាឡិកាវៃឆ្លាតយកមកប្រើប្រាស់ មិនគួរគិតគូរតែអំពីរូបរាងខាងក្រៅនោះទេ ប៉ុន្តែក៏ត្រូវខ្វល់ខ្វាយអំពីមុខងារពិសេសៗដែលអាចជួយសម្រួលដល់ការរស់នៅប្រចាំថ្ងៃផងដែរ។ ជាក់ស្ដែងនាឡិកាវៃឆ្លាតដែលទើបប្រកាសចេញរបស់ Huawei ឈ្មោះថា Watch GT 4 មិនត្រឹមតែមានរូបរាងល្អឆើតឆាយនោះទេ ប៉ុន្តែក៏មានមុខងារទំនើបៗជាច្រើនផងដែរ។
Watch GT 4 ដែលជាអ្នកស្នងតំណែងនាឡិកា Watch GT 3 មានរួមបញ្ចូលបច្ចេកវិទ្យាតាមដានសុខភាពជាច្រើនក្នុងបច្ចេកវិទ្យា TruSeen 5.5 Plus របស់នាឡិកានេះ។ អ្នកប្រើប្រាស់អាចធ្វើការតាមដានចង្វាក់បេះដូង, តាមដានដំណេក, ពិនិត្យមើលកម្រិតអុកស៊ីហ្សែនក្នុងនាម, រាប់ជំហានដែលបានដើរ និងអាចដឹងអំពីចំនួនកាឡូរីដែលបានដុតពេញមួយថ្ងៃផងដែរ។
ជាងនេះទៀត នាឡិកា Watch GT 4 ក៏អាចតាមដានវដ្ដនៃរដូវ ដោយមានការជួយពីការតាមដានកម្រិតស៊ីតុណ្ហភាពក្នុងខ្លួន ហើយបន្ថែមពីនេះវាមានមុខងារថ្មីឈ្មោះថា Sleep Breathing Awareness ដែលអាចជួយកំណត់អំពីរោគសញ្ញាស្ទះដង្ហើមពេលគេង។
ជំងឺស្ទះដង្ហើមពលគេងយប់ មានផលប៉ះពាល់យ៉ាងខ្លាំងក្នុងតំណេកប្រចាំថ្ងៃ ដោយអ្នកជំងឺអាចភ្ញាក់ពីតំណេកភ្លាមៗ ហើយពិបាកនឹងសំរាន្តលក់វិញ ដែលអាចប៉ះពាល់ដល់ការងារប្រចាំថ្ងៃ និងពិបាកក្នុងការបើកបរយាន្តជំនិះដោយខ្លួនឯង។
ក្រៅពីបច្ចេកវិទ្យានេះ Watch GT 4 មានបំពាក់អេក្រង់ AMOLED ទំហំ ១,៤៣អ៊ីញ ជាមួយកម្រិតបង្ហាញដិតច្បាស់ដល់ ៣២៦ភីកសែលក្នុងមួយអ៊ីញ ខណៈដែលថាមពលថ្មទំហំ ៥២៤mAh របស់វា អាចទ្រាំទ្របានដល់ ២សប្ដាហ៍ឯណោះ។
បច្ចុប្បន្ននេះ Huawei Watch GT 4 អាចរកទិញបានលើទីផ្សារកម្ពុជា ក្នុងតម្លៃចាប់ពី ២១៩ដុល្លារ ឡើងទៅ៕