កូវីដ១៩៖ អ្នកជំនាញឲ្យយកចិត្តទុកដាក់បន្ថែម ពេលបើកដំណើរការជើងហោះហើរវិញ

ក្រុមអ្នកជំនាញកំពុងព្រមានក្រុមហ៊ុនអាកាសចរណ៍ឲ្យយកចិត្តទុកដាក់បន្ថែមទៀត នៅពេលដាក់យន្តហោះឲ្យដំណើរការឡើងវិញ បន្ទាប់ពីពួកវាត្រូវបានទុកចោលអស់រយៈពេលជាច្រើន ក្នុងអំឡុងពេលមានជំងឺរាតត្បាតកូវីដ១៩។

ភាពច្របូកច្របល់របស់អ្នកបើកយន្តហោះ, កំហុសក្នុងការថែទាំ និងសូម្បីតែសំបុកសត្វល្អិត ក៏អាចបង្កគ្រោះថ្នាក់ដល់ការបើកដំណើរការជើងហោះហើរឡើងវិញបានដែរ។

គួរឲ្យដឹងថា ការរឹតត្បិតការធ្វើដំណើរ បានបណ្តាលឲ្យមានការធ្លាក់ចុះយ៉ាងខ្លាំងនៃការហោះហើរ ដោយមានយន្តហោះជាច្រើនត្រូវបានគេទុកចោល។ ជាលទ្ធផល គេបានមើលឃើញថា មានការកើនឡើងនូវចំនួនបញ្ហា នៅពេលដែលយន្តហោះវិលត្រឡប់ចូលមកបម្រើសេវាកម្មវិញ។

បញ្ហាដែលគួរឲ្យព្រួយបារម្ភបំផុតមួយគឺ ការកើនឡើងនៃចំនួនចុះចតយ៉ាងលំបាក (poorly-handled landing approaches) និងគ្មានស្ថេរភាព (unstabilised approaches)។ យោងតាមសមាគមដឹកជញ្ជូនតាមផ្លូវអាកាសអន្តរជាតិ (IATA) បានឲ្យដឹងថា ចំនួននៃការចុះចតបែបនេះ បានកើនឡើងយ៉ាងខ្លាំងនៅឆ្នាំ២០២០ នេះ។ ជាលទ្ធផល ពួកវាអាចបណ្តាលឲ្យមានការចុះចតខ្លាំង, រត់ហួសផ្លូវ ឬធ្លាក់ ជាដើម៕