[ប្រទេសរុស្ស៊ី] ក្រសួងឧស្សាហកម្ម និងពាណិជ្ជកម្មនៅទីក្រុងមូស្គូបាននិយាយកាលពីថ្ងៃអង្គារទី ១១ ខែតុលាថា ក្រុមហ៊ុនផលិតរថយន្តជប៉ុន Nissan នឹងលក់ទ្រព្យសម្បត្តិក្នុងរុស្ស៊ីរបស់ខ្លួន រួមទាំងរោងចក្រនៅទីក្រុង Saint Petersburg ទៅរដ្ឋាភិបាលរុស្ស៊ី។
ការប្រកាសនេះធ្វើឡើងបន្ទាប់ពីក្រុមហ៊ុន Nissan បានផ្អាកការផលិតនៅរោងចក្រក្នុងទីក្រុងទីពីររបស់រុស្ស៊ីក្នុងខែមីនា ភ្លាមៗបន្ទាប់ពីក្រុងម៉ូស្គូបានបញ្ជូនទ័ពទៅអ៊ុយក្រែន។
ក្រសួងបាននិយាយនៅក្នុងសេចក្តីថ្លែងការណ៍មួយថា “គណៈកម្មាធិការប្រតិបត្តិរបស់ក្រុមហ៊ុន Nissan បានអនុម័តការលក់ទ្រព្យសម្បត្តិក្នុងរុស្ស៊ីរបស់ខ្លួនទៅឱ្យសហព័ន្ធរុស្ស៊ី ដោយនេះរួមបញ្ចូលទាំងរោងចក្រផលិត និងស្រាវជ្រាវរបស់ក្រុមហ៊ុន Nissan នៅទីក្រុង Saint Petersburg ក៏ដូចជាមជ្ឈមណ្ឌលលក់ និងទីផ្សារនៅទីក្រុងម៉ូស្គូ ក្រោមលក្ខខណ្ឌនៃកិច្ចព្រមព្រៀង Nissan អាចទិញភាគហ៊ុនរបស់ខ្លួនមកវិញក្នុងរយៈពេលប្រាំមួយឆ្នាំខាងមុខ”។
Nissan បាននិយាយនៅក្នុងសេចក្តីថ្លែងការណ៍ដាច់ដោយឡែកមួយថា កិច្ចព្រមព្រៀងនេះនឹងត្រូវបានបញ្ចប់ “នៅក្នុងសប្តាហ៍ខាងមុខនេះ” ដោយបន្ថែមថាក្រុមហ៊ុននឹងទទួលបាននូវទឹកប្រាក់ប្រហែល ៦៨៦,៥លានដុល្លារ។ ក្នុងនោះ Nissan បានបន្ថែមថានិយោជិតរបស់ខ្លួនចំនួន ២ ០០០នាក់នៅក្នុងប្រទេសរុស្ស៊ីនឹងទទួលបាន “ការការពារការងារ” សម្រាប់រយៈពេល ១២ ខែ។
លោក Makoto Uchida នាយកប្រតិបត្តិក្រុមហ៊ុន Nissan បានមានប្រសាសន៍ថា “តាងនាមឱ្យក្រុមហ៊ុន Nissan ខ្ញុំសូមអរគុណសហការីរុស្ស៊ីរបស់យើងសម្រាប់ការរួមចំណែករបស់ពួកគេក្នុងអាជីវកម្មអស់ជាច្រើនឆ្នាំ។ ខណៈពេលដែលយើងមិនអាចបន្តប្រតិបត្តិការនៅក្នុងទីផ្សារបាន យើងបានរកឃើញដំណោះស្រាយដ៏ល្អបំផុតដើម្បីគាំទ្រប្រជាជនរបស់យើង”៕