មន្ត្រីកសិកម្មថៃបាននិយាយកាលពីថ្ងៃចន្ទ ទី ២៩ សីហានេះថា ប្រទេសថៃ និងវៀតណាមបានព្រមព្រៀងសហការគ្នាក្នុងការបង្កើនតម្លៃអង្ករនៅលើទីផ្សារពិភពលោក បន្ទាប់ពីកិច្ចពិភាក្សាជាច្រើនខែក្នុងគោលបំណងក្នុងការលើកកម្ពស់ប្រាក់ចំណូលនៅតាមជនបទ។
លោក Alongkorn Ponlaboot ទីប្រឹក្សារដ្ឋមន្ត្រីក្រសួងកសិកម្ម និងសហករណ៍របស់ប្រទេសថៃ បាននិយាយនៅក្នុងសេចក្តីថ្លែងការណ៍មួយថា “នេះជាលើកទីមួយហើយ ដែលប្រទេសថៃ និងវៀតណាម បានយល់ព្រមសហការគ្នាក្នុងការតម្លើងតម្លៃអង្ករនៅលើទីផ្សារពិភពលោក” ។
ថៃ និងវៀតណាមបានចាប់ផ្តើមកិច្ចចរចាកាលពីខែឧសភា អ្នកនាំពាក្យថៃបាននិយាយថា គោលបំណងគឺដើម្បីដំឡើងថ្លៃការនាំចេញអង្កររបស់ពួកគេ បង្កើនអានុភាពរបស់ពួកគេនៅក្នុងទីផ្សារពិភពលោក និងជំរុញប្រាក់ចំណូលរបស់កសិករ។
ប្រទេសទាំងពីរមានចំនួនប្រហែល ១០ ភាគរយនៃផលិតកម្មអង្ករទូទាំងពិភពលោក និងប្រហែល ២៦ ភាគរយនៃការនាំចេញសកល នេះបើយោងតាមក្រសួងកសិកម្មសហរដ្ឋអាមេរិក៕