អតីតនាយករដ្ឋមន្ត្រីជប៉ុនលោក Shinzo Abe បានទទួលមរណភាព បន្ទាប់ពីគាត់ត្រូវបានបាញ់កាលពីម៉ោងប្រហែល ១១:៣០ព្រឹក ថ្ងៃសុក្រនេះ (៨ កក្កដា) ក្នុងពិធីថ្លែងសុន្ទរកថាក្នុងយុទ្ធនាការឃោសនាបោះឆ្នោតនៅជិតស្ថានីយ៍រថភ្លើងមួយក្នុងទីក្រុង Nara ភាគខាងលិច។
អតីតនាយករដ្ឋមន្ត្រីវ័យ ៦៧ ឆ្នាំបានទទួលមរណភាពនៅម៉ោងប្រហែល ៥ល្ងាចម៉ោងក្នុងស្រុក (ម៉ោង ៣នៅកម្ពុជា)។ វីដេអូដែលផ្សាយដោយ NHK បានបង្ហាញថា លោក Abe កំពុងឈរនៅលើឆាក នៅពេលមានការផ្ទុះខ្លាំងមួយត្រូវបានឮ ជាមួយនឹងផ្សែង។ គាត់បានដួលភ្លាមៗបន្ទាប់ពីត្រូវបានគេបាញ់ ហើយត្រូវបានបញ្ជូនទៅកាន់មន្ទីរពេទ្យ។ មន្ត្រីនាយកដ្ឋានពន្លត់អគ្គិភ័យម្នាក់បាននិយាយថា លោក Abe ទំនងជាស្ថិតក្នុងស្ថានភាពគាំងបេះដូង។
ប៉ូលិសបាននិយាយថា បុរសអាយុ ៤១ ឆ្នាំម្នាក់ដែលសង្ស័យថាជាអ្នកបាញ់ប្រហារត្រូវបានចាប់ខ្លួន។ NHK បានដកស្រង់សម្តីជនសង្ស័យដែលត្រូវបានកំណត់អត្តសញ្ញាណថាជា Tetsuya Yamagami ដែលបានប្រាប់ប៉ូលីសថាគាត់មិនពេញចិត្តនឹង Abe ហើយចង់សម្លាប់គាត់។
វាគឺជាការធ្វើឃាតលើកដំបូងហើយដែលមានការបាញ់សម្លាប់អតីតនាយករដ្ឋមន្ត្រីជប៉ុន ចាប់តាំងពីថ្ងៃនៃរបបយោធានិយមមុនសង្គ្រាមក្នុងទសវត្សរ៍ឆ្នាំ១៩៣០ មក។
ថ្លែងមុនពេលការស្លាប់របស់លោក Abe ត្រូវបានប្រកាស នាយករដ្ឋមន្ត្រី Fumio Kishida បានថ្កោលទោសការបាញ់ប្រហារនេះនៅក្នុង “ព្រៃផ្សៃបំផុត” ខណៈដែលប្រជាជនជប៉ុន និងមេដឹកនាំពិភពលោកបានសម្តែងការភ្ញាក់ផ្អើលចំពោះហេតុការណ៍នេះ។
សមត្ថកិច្ចបានឲ្យដឹងថា ជនសង្ស័យដែលត្រូវបាញ់សម្លាប់នោះមានទីលំនៅភូមិណារ៉ា។ NHK បាននិយាយនៅមុននេះបន្តិចថា កាំភ្លើងដែលប្រើក្នុងការបាញ់ប្រហារនោះ ហាក់ដូចជាអាវុធផលិតក្នុងស្រុកដែលកែច្នៃខ្លួនឯង៕