[រុស្សី] បន្ទាប់ពីវិបត្តិអ៊ុយក្រែនជិតរយៈ ៤ខែ ក្រុមហ៊ុនជាង ១០០មកពីសហភាពអឺរ៉ុប (EU) នៅតែដំណើរការនៅក្នុងប្រទេសរុស្ស៊ី ទោះបីជាមានទណ្ឌកម្មក៏ដោយ។
ការស្រាវជ្រាវដោយវិទ្យាស្ថានភាពជាអ្នកដឹកនាំនៃសាកលវិទ្យាល័យ Yale បង្ហាញថាក្រុមហ៊ុនចំនួន២៤៧ នៅតែដំណើរការនៅក្នុងប្រទេសរុស្ស៊ី ក្នុងនោះមានអាជីវកម្មចំនួន ១១៦ មកពីសហភាពអឺរ៉ុប បើទោះបីជាមានការកើនឡើងសម្ពាធទណ្ឌកម្មលើរដ្ឋាភិបាលរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន។
ក្រុមហ៊ុនទាំងនេះមានចាប់ពីវិស័យម៉ូដ (Gorgio Armani, Lacoste,…) រហូតដល់អាហារ (Nestle, Ritter Sport,…) និងធនាគារ (HSBC, ING Bank,…)។ របាយការណ៍មួយកាលពីខែមុន បានបង្ហាញថាសម្រាប់ក្រុមហ៊ុនភាគច្រើនដែលចាកចេញពីប្រទេសរុស្ស៊ី ប្រាក់ចំណេញពីការកើនឡើងនៃទីផ្សារភាគហ៊ុនគឺគ្រប់គ្រាន់ដើម្បីរ៉ាប់រងលើការចំណាយនៃការចាកចេញពីទីផ្សារ។
បន្ទាប់ពីរុស្ស៊ីបានចាប់ផ្តើមយុទ្ធនាការយោធានៅអ៊ុយក្រែនកាលពីចុងខែកុម្ភៈ ប្រទេសនេះត្រូវបានទទួលរងនូវទណ្ឌកម្មដែលមិនធ្លាប់មានពីមុនមកដោយលោកខាងលិច។ ប្រការនេះបានធ្វើឲ្យអាជីវកម្មជាច្រើនធ្លាក់ចុះ ឬដកខ្លួនចេញទាំងស្រុងពីរុស្ស៊ី ដោយសារខ្លាចការបំពានទណ្ឌកម្ម។ មកទល់នឹងពេលនេះ ការស្រាវជ្រាវរបស់សាកលវិទ្យាល័យ Yale បង្ហាញថា ក្រុមហ៊ុនប្រហែល ១ ០០០បានប្រកាសពីផែនការកាត់បន្ថយទំហំនៃប្រតិបត្តិការរបស់ពួកគេនៅក្នុងប្រទេសរុស្ស៊ី។
កាលពីសប្តាហ៍មុន របាយការណ៍របស់អង្គការប្រឹក្សាយោបល់ក្នុងប្រទេសរុស្ស៊ីបាននិយាយថា ជាងពាក់កណ្តាលនៃក្រុមហ៊ុនបរទេសចំនួន ៥ ០០០ ដែលប្រតិបត្តិការនៅទីនេះបានអះអាងថាមិនមានដែនកំណត់លើសកម្មភាពរបស់ពួកគេ ហើយនឹងបន្តផ្តល់ការងារដល់មនុស្ស ២ លាននាក់ ដោយមានតែក្រុមហ៊ុនប្រហែល ៩០ដែលភាគច្រើននៅក្នុងផ្នែកប្រឹក្សាយោបល់ និងបច្ចេកវិទ្យាបានលក់អាជីវកម្មរបស់ពួកគេ និងផ្លាស់ប្តូរបុគ្គលិក៕