[បរទេស] រដ្ឋមន្រ្តីក្រសួងសេដ្ឋកិច្ច លោក Richard Sulik បានធ្វើការនិយាយនៅលើកញ្ចក់ទូរទស្សន៍ជាតិថា ប្រទេសស្លូវ៉ាគី បានសម្រេចចិត្តទិញឧស្ម័នជាប្រាក់រូប្លែពីប្រទេសរុស្ស៊ី ដើម្បីរក្សាការផ្គត់ផ្គង់របស់ខ្លួន។
ជាមួយគ្នានេះដែរលោក Richard Sulik បានថ្លៃងការណ៍ទៅប្រជាជនរបស់ខ្លួនថាពួកយើងមិនអាចកាត់ផ្តាច់ពីឧស្ម័នពីរុស្ស៊ីបាននោះទេ។ ហើយយើងនឹងប្រើប្រាស់យុទ្ធសាស្រ្តរួមគ្នាជាមួយនឹងសហភាពអឺរ៉ុបទៅលើបញ្ហាផងដែរ។ បន្ថែមពីលោក Richard Sulik បន្តទៀតថាប្រសិនបើមានលក្ខខណ្ឌក្នុងការទូទាត់ជាប្រាក់រូប្លែ នោះយើងនឹងត្រូវបង់។ ខណៈដែលសមាជិកសហភាពអឺរ៉ុបបានពឹងផ្អែកលើឧស្ម័នប្រមាណជាង ៨៥ % នៃតម្រូវការរបស់ខ្លួនពីរុស្ស៊ី។
ដោយទ្បែកបើយោងតាមរបាយការណ៍ពី Reuter បានបញ្ជាក់ថាក្រុមហ៊ុនឧស័្មនរដ្ឋរបស់ប្រទេស Slovakia គឺ SPP ត្រូវបានចំណាយជាវិក័យប័ត្រជាប្រាក់អឺរ៉ូ ក្នុងខែមីនាដែលមានការចែងក្នុងកិច្ចព្រមព្រៀងរបស់ខ្លួនកន្លងមកនេះ។ បន្ថែមពីនេះប្រទេសស្លូវ៉ាគី នៅសល់ពេល ៦ សប្តាហ៍ទៀតដើម្បីស្វែករកដំណោះស្រាយមុនពេលការទូទាត់ឧស្ម័នបន្ទាប់នៅថ្ងៃទី ២០ ខែឧសភាខាងមុខនេះ។
គួររំលឹកផងដែរថាកាលពីសប្តាហ៍មុនរុស្ស៊ីបានទាមទារឱ្យប្រទេសដែលជាសត្រូវរបស់ខ្លួនរួមទាំងសមាជិកអឺរ៉ុបផងនោះត្រូវបង់ប្រាក់ជាប្រាក់រូប្លែសម្រាប់ការទិញឧស្ម័នពីប្រទេសខ្លួន។
សូមបញ្ជាក់ថាកាលពីថ្ងៃសុក្រ លោក Dmitry Peskov រដ្ឋលេខាធិការសារព័ត៌មានរបស់លោកប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយថាការសម្រេចិត្តបែបនេះធ្វើឱ្យធានានូវសុវត្ថិភាពការធ្វើពាណិជ្ជកម្ម និងអះអាងកាន់តែច្បាស់លាស់ថាអ្នកទិញទទួលបានប្រាក់ដែលមិនជាប់ពាក់ព័ន្ធទៅនឹងអ៊ុយក្រែន និងទណ្ឌកម្មរបស់សហរដ្ឋអាមេរិក ឬ លោកខាងលិច នោះទ្បើយ៕
