ប្រធានាធិបតីអាមេរិក លោគ ដូណាល់ ត្រាំ មានអតិថិជនច្រើនណាស់។ មានអ្នកខ្លះទិញអាហារនៅ Trump Tower របស់លោក ដោយចំណាយ ២០ ដុល្លារលើប៊ឺហ្គឺរ។ មានអ្នកដែលស្នាក់នៅក្នុងបន្ទប់សណ្ឋាគាររបស់លោក ដោយចំណាយ ៤៧៥ ដុល្លារសម្រាប់គ្រែមួយ។ មានអ្នកផ្សេងទៀតចូលរួមក្លឹបដែលគ្រប់គ្រងដោយលោក ត្រាំ ប្រហែលជាចាយលុយដល់ ២០ ម៉ឺនដុល្លារ។ ប៉ុន្តែអតិថិជនសំខាន់បំផុតរបស់ប្រធានាធិបតីអាមេរិករូបនេះ គឺក្រុមហ៊ុនជួលទីតាំងនៅអគារ Trump Tower របស់លោក។
បើនិយាយឲ្យចំទៅវាមិនច្រើនប៉ុន្មានទេ ប៉ុន្តែពួកគេចាយលុយដុំ។ តាមពិតគ្រាន់តែអ្នកជួល ២៥ នាក់នោះ បានបង់ថ្លៃជួលប្រមាណ ១១៥ លានដុល្លារជារៀងរាល់ឆ្នាំឲ្យទៅលោក ត្រាំ បាត់ទៅហើយ។ ការបង់ប្រាក់នោះមានចំនួនប្រហែល ២០% នៃប្រាក់ចំណូលទាំងអស់ ដែលហូរចូលក្នុងអាណាចក្រជំនួញរបស់លោក ត្រាំ។
ដោយសារតែការជួលកន្លែងទំនេរជាអាជីវកម្មដែលមានប្រាក់ចំណេញខ្ពស់ ដូច្នេះទឹកប្រាក់ចំនួន ១១៥ លានដុល្លារ អាចនឹងទទួលបានប្រាក់ចំណេញប្រតិបត្តិការចំនួន ៦៥ លានដុល្លារ ឬប្រហែល ៤០ ភាគរយនៃប្រាក់ចំណូលសរុបរបស់ Trump Organization នៅក្នុងឆ្នាំធម្មតា។
គួរឲ្យដឹងថា ម៉ូយធំ ២ ដែលជួយរកចំណូលឲ្យលោក ត្រាំ បានច្រើនបំផុតគឺ Gucci និង Nike ដែលចាយលុយប្រហែល ២២លានដុល្លារ និង ១៣លានដុល្លារក្នុងមួយឆ្នាំៗ៕