ការសិក្សាថ្មី៖ តម្លៃផលិតឡានអគ្គិសនី អាចស្មើនឹងឡានប្រើម៉ាស៊ីនប្រេង នៅឆ្នាំ២០២៤

ការសិក្សារថ្មីមួយបានបង្ហាញឲ្យដឹងថា តម្លៃចំណាយសម្រាប់ការផលិតរថយន្តអគ្គិសនី អាចស្មើរថយន្តប្រើម៉ាស៊ីនចំហេះក្នុង (ប្រើប្រេងម៉ាស៊ូត ឬសាំង) លឿនបំផុតត្រឹមដើមឆ្នាំ២០២៤។

ពាណិជ្ជកម្ម

ការស្រាវជ្រាវពីធនាគារវិនិយោគស្វីស UBS បង្ហាញថា ការចំណាយបន្ថែមក្នុងការផលិតអាគុយសម្រាប់រថយន្តអគ្គិសនី បើប្រៀបធៀបនឹងរថយន្តប្រើម៉ាស៊ីនចំហេះក្នុង នឹងធ្លាក់ចុះមកសល់ត្រឹមតែ ១ ៩០០ ដុល្លារក្នុងមួយរថយន្ត នៅឆ្នាំ ២០២២ មុននឹងស្មើគ្នាទាំងស្រុងនៅឆ្នាំ ២០២៤។

UBS បានឈានដល់ការសន្និដ្ឋាននេះ ដោយវិភាគលើអាគុយពីក្រុមហ៊ុនផលិតអាគុយធំៗបំផុតចំនួន ៧។ នេះដោយសារតែអាគុយមានតម្លៃចន្លោះពី ១ភាគ៤ ទៅ ២ភាគ៥ នៃថ្លៃរថយន្តអគ្គិសនីទាំងមូល។ ធនាគារវិនិយោគខាងលើបានបន្ថែមថា ថ្លៃដើមអាចធ្លាក់ចុះដល់ក្រោម ១០០ ដុល្លារក្នុងមួយគីឡូវ៉ាត់ម៉ោង ត្រឹមឆ្នាំ ២០២២។

UBS ក៏រំពឹងថា ចំណែកទីផ្សាររថយន្តអគ្គិសនីនឹងឈានដល់ ១៧ ភាគរយនៃការលក់ជាសកល នៅឆ្នាំ ២០២៥ និង ៤០ ភាគរយនៅឆ្នាំ ២០៣០ ទៀតផង៕