បន្ទាប់ពីប្រកាសគ្រោងដាក់បង្ហាញចេញជាផ្លូវការនូវស្មាតហ្វូនស៊េរីថ្មីរបស់ខ្លួនគឺ iPhone 17 Series នៅក្នុងថ្ងៃទី 9 ក្នុងខែកញ្ញា នេះ ពេលនេះ ក្រុមហ៊ុន Apple គឺត្រូវបានគេរាយការណ៍ហើយថា អាចនឹងមិនដាក់រន្ធដាក់ស៊ីមនៅក្នុង iPhone 17 របស់ខ្លួនបន្តទៀតនោះឡើយ ពោលគឺនឹងផ្លាស់ប្តូរទៅប្រើតែ eSIM វិញ។
ក្នុងនោះ សម្រាប់ម៉ូឌែលដំបូងគេដែលគ្មានរន្ធដាក់ស៊ីមនោះគឺ iPhone 17 Air ខណៈម៉ូឌែលផ្សេងៗទៀតដូចជា iPhone 17, 17 Pro និង iPhone 17 Pro Max វិញ គឺអាចនឹងដករន្ធដោតស៊ីមដែរ ប៉ុន្តែអាចនឹងធ្វើឡើងសម្រាប់តែទីផ្សារមួយចំនួនក្នុងតំបន់អឺរ៉ុបតែប៉ុណ្ណោះ។
គួរបញ្ជាក់ថា ហេតុផលសំខាន់នៃការដករន្ធដាក់ស៊ីមនេះគឺ Apple ចង់ឲ្យ iPhone របស់ខ្លួនកាន់ស្តើង និងមានរូបរាងកាន់តែទាន់សម័យជាងមុន ដូច្នេះការលុបចោលរន្ធស៊ីមនឹងជួយអោយក្រុមហ៊ុនអាចបន្ថែមនូវលក្ខណៈពិសេសផ្សេងៗទៀតសម្រាប់ iPhone ជំនាន់ថ្មីនេះ ពោលគឺនឹងមានការបង្កើនទំហំថាមពលថ្ម និងកាមេរ៉ាជាដើម៕