អាជ្ញាធរថៃធ្វើការនៅក្នុងផ្នែកថាមពល និងការអភិវឌ្ឍបរិស្ថាន កំពុងរៀបចំផែនការមេ ដើម្បីជួយប្រទេសរបស់ខ្លួនឲ្យឈានដល់ “គ្មានការបំភាយកាបូនសុទ្ធ” (zero net carbon emissions)។
ការបោះជំហាននេះត្រូវបានផ្តួចផ្តើមឡើងនៅក្នុងកិច្ចប្រជុំនាពេលថ្មីៗនេះ ដែលដឹកនាំដោយរដ្ឋមន្រ្តីក្រសួងថាមពល លោក Supattanapong Punmeechao និង លោក Varawut Silpa-archa រដ្ឋមន្រ្តីក្រសួងធនធានធម្មជាតិ និងបរិស្ថាន ជាមួយក្រុមហ៊ុន Siam Cement Group។
គួរឲ្យដឹងថា គោលដៅនៃកិច្ចប្រជុំនោះ គឺដើម្បីរៀបចំយុទ្ធសាស្ត្ររយៈពេលវែងសម្រាប់ប្រទេសថៃ លើការកាត់បន្ថយការប្រែប្រួលអាកាសធាតុ និងទប់ស្កាត់ការបំភាយឧស្ម័នកាបូនិច។
លោក Kulit Sombasiri លេខាធិការអចិន្ត្រៃយ៍នៃក្រសួងថាមពលថៃ បានមានប្រសាសន៍ថា គំនិតផ្តួចផ្តើមត្រូវបានស្នើឡើងដើម្បីផ្លាស់ប្តូរប្រេងឥន្ធនៈរបស់ប្រទេសថៃ នៅក្នុងឧស្សាហកម្មផលិតថាមពល ដែលនឹងកាត់បន្ថយឧស្ម័នកាបូនិក, បង្កើតឧស្សាហកម្មយានយន្តអគ្គិសនី និងគ្រប់គ្រងកាកសំណល់។
ផែនការនេះក៏រួមមានការគាំទ្រពី ទំនិញដែលផលិតចេញពីដំណើរការកាបូនទាប, គម្រោងឆ្លាតវៃលើកសិដ្ឋាន និងតំបន់ទីប្រជុំជន ព្រមទាំងប្រព័ន្ធស្តុកកាបូន ផងដែរ៕