បើយោងតាម @OnLeaks បានដាក់បង្ហាញចេញនូវរូបភាព Render របស់ស្មាតហ្វូន Google Pixel 10 Series ដែលរួមមានទាំងម៉ូឌែល Pixel 10, Pixel 10 Pro និង Pixel 10 Pro XL ជាមួយនឹងការកែលម្អជាច្រើនបើប្រៀបធៀបទៅនឹង Pixel 9 ។
ក្នុងនោះ ស្មាតហ្វូនសេរ៊ីថ្មីនេះ នឹងមានការរចនាតួខ្លួនដូចគ្នានឹងម៉ូឌែលជំនាន់មុនដែរ ប៉ុន្តែការរចនាផ្នែកកាមេរ៉ានឹងមានសភាពធំជាងជំនាន់មុន។
ចំពោះ Pixel 10 នឹងមានទំហំប្រហាក់ប្រហែលនឹង Pixel 9 ជាមួយប្រវែង ១៥២,៨ ម.ម ទទឹង ៧២ ម.ម និងកម្រាស់ ៨,៦ ម.ម ជាមួយនឹងអេក្រង់ OLED ទំហំ ៦,៣ អ៊ីញ។ ខណៈការផ្លាស់ប្តូរចំនួន ២ ដែលសំខាន់របស់វា គឺនឹងទទួលបានកាមេរ៉ា telephoto ជាលើកដំបូង រួមជាមួយនឹងការការថតវីដេអូកម្រិត 4K 60fps HDR ។
ចំណែក Pixel 10 Pro ក៏នឹងទទួលបាននូវការកែលម្អទៅលើផ្នែកកាមេរ៉ា និងប្រព័ន្ធ hardware ដែលប្រសើរជាងមុនផងដែរ។ ខណៈ Pixel 10 Pro XL វិញ គឺមានទំហំធំជាងជាមួយប្រវែង ១៦២,៧ ម.ម ទទឹង ៧៦,៦ ម.ម និងកម្រាស់ ៨,៥ ម.ម ជាមួយនឹងអេក្រង់ OLED ទំហំ 6.8 អ៊ីញ។ លើសពីនេះ វាក៏នឹងទទួលបាននូវការកែលម្អទៅលើផ្នែកកាមេរ៉ាផងដែរ។
ទន្ទឹមនឹងនេះ ស្មាតហ្វូនសេរ៊ីថ្មីនេះ នឹងដំណើរការដោយឈីប Tensor G5 3nm ដែលផលិតដោយ TSMC ហើយក្រុមហ៊ុន Google ក៏កំពុងសាកល្បងម៉ូឌឹម MediaTek T900 ដើម្បីបង្កើនប្រសិទ្ធភាពបណ្តាញតភ្ជាប់អ៊ីនធឺណិតរបស់ពួកគេផងដែរ។
គួរបញ្ជាក់ថា Google Pixel 10 Series នឹងប្រកាសចេញនៅក្នុងខែមិថុនា ឆ្នាំ ២០២៥ រួមជាមួយនឹងប្រព័ន្ធប្រតិបត្តិការ Android 16 ចេញពីប្រអប់៕