ទីក្រុងហូជីមិញ គ្រោងកែលម្អហេដ្ឋារចនាសម្ព័ន្ធ ដោយចាយលុយសរុប ៤,៣ ពាន់លានដុល្លារ

ទីក្រុងហូជីមិញ របស់ប្រទេសវៀតណាម បានផ្តល់អាទិភាពដល់គម្រោងហេដ្ឋារចនាសម្ព័ន្ធចំនួន ២១ ក្នុងនោះមាន ១៥ សម្រាប់ការដឹកជញ្ជូន ដែលនឹងត្រូវបញ្ចប់ក្នុងរយៈពេល ២-៣ឆ្នាំខាងមុខ ដោយចំណាយថវិកាប្រមាណ ១០០ ទ្រីលានដុង (ប្រមាណ ៤,៣៣ ពាន់លានដុល្លារ) ។

ពាណិជ្ជកម្ម

យោងតាមនាយកដ្ឋានដឹកជញ្ជូនទីក្រុងហូជីមិញ បានឲ្យដឹងថា ផ្លូវដែលធំជាងគេនៅក្នុងបញ្ជីគឺផ្លូវ No. 1 Elevated Road ដែលស្ថិតនៅរវាងស្រុក Tan Binh និង Binh Thanh ដែលមានទំហំទឹកប្រាក់ ១៧,៥ ទ្រីលានដុង។ បន្ទាប់មកទៀត គឺ ផ្លូវ No. 5 Elevated Road ដែលតភ្ជាប់រវាងទីក្រុង Thu Duc City និង District 12 ដែលមានទំហំទឹកប្រាក់ ១៥,៤ ទ្រីលានដុង។

ក្នុងបញ្ចីខាងលើក៏រួមបញ្ចូលទាំងស្ពានចំនួន ៧, ផ្លូវក្រវ៉ាត់ និងការពង្រីកផ្នែកមួយនៃផ្លូវជាតិផងដែរ។ មិនតែប៉ុណ្ណោះ ស្ថានីយ៍រថយន្ដក្រុងថ្មីមួយនឹងត្រូវបានសាងសង់ នៅភាគខាងលិច ព្រមទាំងឃ្លាំងកុងតឺន័រផងដែរ នៅក្នុងទីក្រុង Thu Duc ។

នាយកដ្ឋានខាងលើបាននិយាយថា ដោយសារទាំងនេះគឺជាគម្រោងសំខាន់ និងបន្ទាន់ ពួកគេគួរតែទទួលបានអាទិភាពមូលនិធិ។ ទីក្រុងនេះនឹងចំណាយថវិកាចំនួន ៣២ ទ្រីលានដុង សម្រាប់គម្រោងដឹកជញ្ជូនចំនួន ១៥ ខណៈគម្រោងដែលនៅសល់ នឹងត្រូវផ្តល់មូលនិធិក្រោមគំរូភាពជាដៃគូសាធារណៈ-ឯកជន៕