ថៃ គ្រោងនឹងអនុញ្ញាតឲ្យភ្ញៀវទេសចរបរទេស អាចធ្វើចត្តាឡីស័ក នៅក្នុងរមណីយដ្ឋាននានា

រដ្ឋមន្រ្តីក្រសួងទេសចរណ៍ថៃ លោក Phiphat Ratchakitprakarn បាននិយាយនៅថ្ងៃព្រហស្បតិ៍នេះថា លោកនឹងស្នើផែនការសម្រាប់ជនបរទេសដើម្បីអនុវត្តការធ្វើចត្តាឡីស័ក នៅក្នុងតំបន់ទេសចរណ៍ដ៏ពេញនិយម រួមទាំង រមណីយដ្ឋានឆ្នេរសមុទ្រ ក្នុងគោលបំណងជួយធ្វើឲ្យវិស័យទេសចរណ៍ងើបឡើងវិញ។

ពាណិជ្ជកម្ម

គួរឲ្យដឹងថា សេដ្ឋកិច្ចក្នុងប្រទេសថៃបានធ្លាក់ចុះខ្លាំងបំផុតក្នុងរយៈពេលជាងពីរទសវត្សរ៍ កាលពីឆ្នាំមុន ដោយសារវិស័យទេសចរណ៍ធ្លាក់ចុះ ដែលបណ្តាលមកពីការរីករាលដាលនៃជំងឺឆ្លងកូវីដ១៩។

លោក Phiphat Ratchakitprakarn បានប្រាប់អ្នកយកព័ត៌មានថា ផែនការដាក់ឲ្យធ្វើចត្តាឡីស័កនៅសណ្ឋាគារ ត្រូវបានគេរំពឹងថានឹងចាប់ផ្តើមនៅខែមេសា ឬឧសភា នៅតាមខេត្តPhuket, Krabi, Surat Thani, Chonburi និង Chiang Mai។

លោកបានបញ្ជាក់ថា “ហេតុអ្វីបានជាខេត្តទាំងនេះ? ដោយសារពួកវាពេញនិយមក្នុងចំណោមភ្ញៀវទេសចរ ដែលតែងស្នាក់នៅរយៈពេលយូរ គឺមានពី ១ ទៅ ៣ ខែ”។

លោក Phiphat បានបន្ថែមថា អ្នកទេសចរនឹងត្រូវធ្វើចត្តាឡីស័ក រយៈពេលពីរសប្តាហ៍ ប៉ុន្តែប្រសិនបើពួកគេធ្វើតេស្តអវិជ្ជមានបន្ទាប់ពីរយៈពេលបីថ្ងៃ ពួកគេនឹងត្រូវអនុញ្ញាតឲ្យចេញពីបន្ទប់នៅក្នុងតំបន់សណ្ឋាគារ មុនពេលធ្វើដំណើរទៅកាន់តំបន់ផ្សេងទៀតនៃប្រទេស៕