ក្រុមហ៊ុនអាកាសចរណ៍វៀតណាម Vietnam Airlines បានរាយការណ៍ពីការខាតបង់ទឹកប្រាក់ជាង ៤៨៣ លានដុល្លារ កាលពីឆ្នាំមុន នៅពេលដែលជំងឺកូវីដ១៩ បានបង្កឲ្យបិទជើងហោះហើរអន្តរជាតិទាំងអស់។
ទោះជាយ៉ាងណាក៏ដោយ តួលេខខាងលើនេះគឺទាបជាងការព្យាករណ៍របស់ Vietnam Airlines កាលពីខែធ្នូ ដែលមានចំនួនជាង ៥២១លានដុល្លារ។
មិនតែប៉ុណ្ណោះ ប្រាក់ចំណូលបានធ្លាក់ចុះជិត ៥៩ ភាគរយ ស្មើនឹង ១,៧ ពាន់លានដុល្លារ ដោយសារចំនួនជើងហោះហើរសរុបរបស់វាបានធ្លាក់ចុះជាង ២៧ ភាគរយ សល់ត្រឹម ៨៦ ៩៧៨ ជើង។
គួរឲ្យដឹងថា ថ្មីៗនេះរដ្ឋាភិបាលវៀតណាម បានអនុម័តថវិកាសង្គ្រោះសម្រាប់ក្រុមហ៊ុនអាកាសចរណ៍ ដោយធនាគាររដ្ឋនៃប្រទេសវៀតណាម State Bank of Vietnam (SBV) បានអនុញ្ញាតឲ្យផ្តល់ប្រាក់កម្ចីដែលមានទឹកប្រាក់ដល់ទៅ ១៧៣ លានដុល្លារ ក្នុងអត្រាការប្រាក់សូន្យ។
ក្រុមហ៊ុនអាកាសចរណ៍វៀតណាម Vietnam Airlines ក៏បានទទួលការអនុញ្ញាតឲ្យលក់ភាគហ៊ុនបន្ថែមទៀត ដល់ម្ចាស់ភាគហ៊ុនដែលមានស្រាប់ ដើម្បីបង្កើនដើមទុនរបស់ខ្លួនផងដែរ៕