រយៈពេលមួយឆ្នាំបន្ទាប់ពី YouTube បើកដំណើរការមុខងាររកចំណូលពីវីដេអូទម្រង់ខ្លី YouTube Shorts អ្នករកចំណូលពីមុខងារនេះបន្តកើនឡើងជាលំដាប់។ ជាក់ស្ដែង មានម្នាក់ ក្នុងចំណោម ៤នាក់ ស្ថិតក្នុងកម្មវិធីរកចំណូល Partner Program គឺកំពុងទទួលបានចំណូលពីមុខងារ Shorts។
YouTube បានឲ្យដឹងថាបច្ចុប្បន្នមានអ្នកផលិតវីដេអូជាង ៣លាននាក់ កំពុងស្ថិតក្នុងកម្មវិធីរកប្រាក់ចំណូល Partner Program មានន័យថា មានប្រមាណ ៧៥ម៉ឺននាក់ គឺកំពុងរកប្រាក់ចំណូលពីវីដេអូទម្រង់ខ្លី YouTube Shorts។
ក្រុមហ៊ុន YouTube មិនបានបង្ហាញថាខ្លួនបានចែកប្រាក់ចំណូលប៉ុន្មានទៅកាន់អ្នកផលិតវីដេអូ Shorts នោះទេ ប៉ុន្តែក្នុងរយៈពេល ៣ឆ្នាំចុងក្រោយនេះ YouTube បានចែកប្រាក់ចំណូលដល់អ្នកផលិតវីដេអូសរុប ៧០ពាន់លានដុល្លារ ដោយមួយផ្នែកធំគឺបានទៅលើវីដេអូទម្រង់វែង។
ងាកទៅមើលតួលេខពី YouTube Shorts ឃើញថាមានកំណើនចំនួនវីដេអូដែលបង្ហោះ ចំនួន ៥០% ធៀបនឹងកាលពីឆ្នាំមុន ហើយបច្ចុប្បន្នមានចំនួនទស្សនា ៧០ពាន់លានដងក្នុងមួយថ្ងៃ ៕