ការលក់ iPhone របស់ Apple នៅប្រទេសចិន កាលពីខែកុម្ភៈ មានការថយចុះ ៣៣% ធៀបនឹងពេលដូចគ្នាកាលពីឆ្នាំ២០២៣។ នេះបើតាមការចុះផ្សាយរបស់ Bloomberg ដែលទទួលបានតួលេខពីរដ្ឋាភិបាលចិន។
របាយការណ៍ចេញពីបណ្ឌិត្យសភាបច្ចេកវិទ្យាព័ត៌មាន និងទំនាក់ទំនងរបស់ចិន បានបង្ហាញថាការលក់ស្មាតហ្វូនរបស់ម៉ាកយីហោបរទេសនៅប្រទេសចិន កាលពីខែកុម្ភៈ សម្រេចបាន ២,៤លានគ្រឿង។ ដោយ Apple ជាក្រុមហ៊ុនបរទេសតែមួយគត់មានចំណែកទីផ្សារធំ ហេតុនេះ Apple កាន់កាប់ចំណែកធំនៃចំនួនលក់ ២,៤លានគ្រឿងនេះ។
ការថយចុះការលក់របស់ Apple នៅខែកុម្ភៈ កត់ត្រាថាជាការធ្លាក់ចុះបីខែជាប់គ្នា។ កាលពីខែមករា Apple លក់ iPhone បានប្រមាណ ៥,៥លានគ្រឿង ដែលថយចុះ ៣៩% ធៀបនឹងតួលេខឆ្នាំចាស់ ខណៈកាលពីខែធ្នូ ឆ្នាំ២០២៣ ការលក់របស់ Apple បានថយចុះ ៣០% ធៀបនឹងខែធ្នូ ឆ្នាំ២០២២។
តួលេខថ្មីនេះបានបង្ហាញដែរថា ក្រុមហ៊ុន Apple ទំនងជាពិបាកនឹងស្រោចស្រង់ការលក់ iPhone នៅប្រទេសចិន ដោយកាលពេញមួយឆ្នាំ ២០២៣ ការលក់បានថយចុះ ២៤% ហើយចូលដល់ឆ្នាំ២០២៤ ក៏មិនទាន់ឃើញមានសញ្ញាវិជ្ជមាននៅឡើយ។
ការលក់ថយចុះនេះ ទំនងជាបណ្ដាលមកពីការសម្រេចរបស់រដ្ឋាភិបាលចិនកាលពីឆ្នាំមុន ដែលបានហាមប្រាមការប្រើប្រាស់ iPhone នៅតាមស្ថាប័នរដ្ឋ និងក្រុមហ៊ុនរដ្ឋជាច្រើន។ ទន្ទឹមនឹងនេះ Apple ក៏រងការប្រកួតប្រជែងពីសំណាក់ស្មាតហ្វូន Huawei Mate 60 Series ដែលទទួលបានប្រជាប្រិយភាពខ្លាំងនៅប្រទេសចិន ក្រោយការប្រកាសចេញកាលពីខែកញ្ញាកន្លងទៅ៕