នាដើមសប្ដាហ៍នេះ ក្រុមហ៊ុន Apple បានបន្ថែមផ្នែកថ្មីឈ្មោះថា “Why Upgrade” លើវិបសាយរបស់ខ្លួននៅសហរដ្ឋអាមេរិក ដែលផ្នែកនេះបង្កើតមកក្នុងគោលបំណងលើកចិត្តអតិថិជនដែលកំពុងប្រើ iPhone ស៊េរីចាស់ ឲ្យឡើងស៊េរីមកកាន់ម៉ូដែលថ្មី។
ផ្នែកថ្មីនេះអាចឲ្យអតិថិជនប្រៀបធៀប iPhone 11, 11 Pro, 11 Pro Max, 12, 12 mini, 12 Pro និង 12 Pro Max ជាមួយ iPhone 15, iPhone 15 Plus, iPhone 15 Pro ឬ iPhone 15 Pro Max។
ការប្រៀបធៀបនីមួយៗមានបង្ហាញអំពីមុខងារថ្មីដែលអ្នកប្រើ iPhone ចាស់អាចទទួលបាននៅពេលឡើងស៊េរីទៅកាន់ iPhone 15។ ជាក់ស្ដែងដូចជា iPhone 11 ពេលដូរមកកាន់ iPhone 15 នឹងទទួលបានកម្រិតរូបថតធំជាងមុន ៤ដង, មានទំហំអង្គផ្ទុក Base ធំជាងមុន, មានមុខងារ Action Mode ក៏ដូចជា Cinematic Mode សម្រាប់ការថតវីដេអូ, មានរន្ធ USB-C, មាន GPU លឿនជាងមុន ៦០% និងមាន 5G ជាដើម។
បន្ថែមពីនេះ Apple ក៏បានប្រាប់អំពីតម្លៃនៃ iPhone ចាស់ៗ នៅពេលដែលយកវាមកប្ដូរជាមួយ iPhone ថ្មី ដើម្បីដឹងថាអតិថិជនអាចទទួលបានការបញ្ចុះតម្លៃប៉ុន្មាននៅពេលទិញ iPhone ថ្មី៕