ប្រព័ន្ធប្រតិបត្តិការ iOS 18 នឹងអាចដំឡើងបានលើ iPhone XR, iPhone XS និង iPhone XS Max ដែលជាម៉ូដែលប្រើប្រាស់ឈីប A12 Bionic ដូចគ្នា។ នេះបើតាមការបង្ហោះលើបណ្ដាញ X ចេញពីគណនីឯកជនមួយដែលមានប្រវត្តិចែកចាយដំណឹងត្រូវៗអំពី iOS ជំនាន់ថ្មី។
ប្រសិនបើដំណឹងនេះជាការពិត មានន័យថា iPhone XR, iPhone XS និង iPhone XS Max នឹងជា iPhone ដែលទទួលបានការកំណែទម្រង់ច្រើនជំនាន់ជាងគេ ខណៈដែលកាលពី iOS 17 ក្រុមហ៊ុន Apple បានដក iPhone X និង iPhone 8 Series ចេញពីបញ្ជី iPhone ដែលអាចដំឡើង iOS 17 បាន។
Apple ត្រូវបានគេរំពឹងថានឹងប្រកាសចេញ iOS 18 នៅក្នុងកម្មវិធីប្រចាំឆ្នាំ WWDC ក្នុងខែមិថុនា ហើយការអាប់ដេតអាចនឹងបញ្ចេញនៅខែកញ្ញា សម្រាប់ iPhone ដែលនឹងអាចដំឡើងបាន។
គួរដឹងដែរថាប្រភពខាងលើបានលើកឡើងថា iPadOS 18 អាចនឹងលុបឈ្មោះ iPad ដែលប្រើបន្ទះឈីប A10X Fusion ចេញពិបញ្ជី iPad ដែលអាចដំឡើង iPadOS 18 បាន៕