ស្មាតហ្វូនបត់កំពូលធូរថ្លៃតម្លៃជាង ២០០ដុល្លារ បង្ហាញខ្លួននៅជប៉ុន

ស្មាតហ្វូនបត់ ZTE Libero Flip ដែលចូលខ្លួនមកប្រកួតប្រជែង Galaxy Z Flip5 បានបង្ហាញវត្តមានលើទីផ្សារប្រទេសជប៉ុន ជាមួយតម្លៃលក់រាយត្រឹមតែប្រមាណ ៤២០ដុល្លារ ប៉ុណ្ណោះ ប៉ុន្តែសម្រាប់ការបញ្ជាទិញទុកមុន ទទួលបានការបញ្ចុះតម្លៃមកនៅត្រឹមប្រមាណ ២៦៥ដុល្លារ។

ពាណិជ្ជកម្ម

ស្មាតហ្វូនថ្មីរបស់ ZTE នេះមានបំពាក់អេក្រង់ OLED បត់បានដែលមានទំហំ ៦,៩អ៊ីញ ជាមួយកម្រិតបង្ហាញ FHD+ និងមានអេក្រង់ទីពីរទំហំ ១,៤៣អ៊ីញ ជាមួយកម្រិតបង្ហាញ 466 x 466px។ អេក្រង់ទីពីរអាចប្រើការសម្រាប់ទទួលទូរសព្ទ បញ្ជាការចាក់ចម្រៀង និងប្រើជាអេក្រង់សម្រាប់មើលពេលថតរូបជាមួយកាមេរ៉ាគោលបាន។

កាមេរ៉ាគោលមានទំហំ 50MP អមជាមួយកាមេរ៉ាវាស់ជម្រៅទំហំ 2MP ខណៈដែលលើអេក្រង់ខាងក្នុងមានកាមេរ៉ាទំហំ 16MP ដែលឌីហ្សាញបែបចោះរន្ធលើអេក្រង់។

ZTE បានញាត់បន្ទះឈីប Snapdragon Gen 1 ជាមួយ RAM 6GB និងអង្គផ្ទុក 128GB ហើយវាដំណើរការដោយប្រព័ន្ធប្រតិបត្តិការ Android 13 ជាមួយ ZTE UI ផងដែរ។

ស្មាតហ្វូននេះមានបំពាក់ថ្មទំហំ 4310mAh អាចសាកភ្លើងកម្លាំង 33W និងមានមុខងារ Quick Charge 4+ ជាមួយស្តង់ដារ PD3.0 ក៏ដូចជាសមត្ថភាពធន់នឹងទឹកកម្រិត IP42 ផងដែរ៕